ព្រះសីហនុ -នៅវេលាម៉ោង១៨:២០នាទី ថ្ងៃទី១៧ ខែសីហា ឆ្នាំ២០២៤ មានករណីគ្រោះថ្នាក់ចរាចរណ៍មួយកើតឡើងរវាងរថយន្តបុកប៉ះនឹងរថយន្ត ក្នុងទិសដៅបញ្ច្រាស់ទិសគ្នា តាមបណ្តោយលើផ្លូវជាតិលេខ៤ ត្រង់ចន្លោះបង្គោលគីឡូម៉ែត្រលេខ: ១៨៧-១៨៨ ស្ថិតក្នុងភូមិទួលទទឹង២ ឃុំទួលទទឹង ស្រុកព្រៃនប់ ខេត្តព្រះសីហនុ ។

យោងតាមប្រភពពីផេកផ្លូវការរបស់កងរាជអាវុធហត្ថខេត្តព្រះសីហនុ ហេតុការណ៍គ្រោះថ្នាក់ខាងលើ បណ្តាលឱ្យមានមនុស្សស្លាប់ចំនួន ០៥នាក់ (ប្រុស០១នាក់) និងរងរបួសធ្ងន់ ០២នាក់ (ប្រុស០១នាក់) ចំពោះមុខកម្លាំងល្បាតនៃមូលដ្ឋានកងរាជអាវុធហត្ថស្រុកព្រៃនប់ បានជួយសម្រួលចរាចរណ៍ បញ្ជៀសការកកស្ទះលើដងផ្លូវ នៅទីតាំងកន្លែងកើតហេតុ និងជួយលើកដាក់សពជនរងគ្រោះ និងអ្នករងរបួស ឡើងលើរថយន្តពេទ្យដឹកបញ្ជូនទៅសង្រ្គោះព្យាបាលភ្លាមៗ។