ខេត្តសៀមរាប៖ ក្មួយប្រុសថូ ថាវ អាយុ៨ឆ្នាំ និងក្មួយស្រី ថូ សុឡាត់ អាយុ១២ឆ្នាំ ត្រូវក្លាយជាក្មេងកំព្រាព្រោះតែឪពុកបានចង ក សម្លាប់ខ្លួន មិនបានប៉ុន្មានម្តាយក៏ចង ក ស្លាប់ទៅតាមប្តីទៅទៀត ។អ្វីដែលបន្សល់ទុកគឺកូនប្រុសស្រី២នាក់ត្រូវរស់នៅយ៉ាងសង្វែកក្នុងខ្ទមកំសត់ដាច់ពីភូមិគេថែមទៀត ពោល មិនខុសពីពាក្យចាស់ពោលថាមានសម្បុកអត់មេនោះឡើយ។
តាំងពីឪពុកនិងម្តាយធ្វើអត្តឃាតកន្លងអស់រយ:៣ឆ្នាំទៅហើយ ក្មួយស្រីជាកូនច្បងមានតួនាទីធ្វើជាម្តាយផងឪពុកផងគឺមើលថែប្អូនប្រុសទើបអាយុ៨ឆ្នាំ ខណ:គ្មានអាហារហូបចុកគ្រប់គ្រាន់នោះដែរ។
អង្គុយលើគ្រែរនាបឬស្សីតូចមួយនៅបរិវេនខ្ទមកំសត់ស្ថិតនៅភូមិប្រាសាទចារ្យ ឃុំដូនកែវ ស្រុកពួក ខេត្តសៀមរាប ក្មួយស្រីថាវ សុឡាត់បានរៀបរាប់ទាំងទឹកភ្នែកថាសព្វថ្ងៃអាហារហូបចុកបានមកពីអ៊ុំពូមីងមិនបានគ្រប់គ្រាន់ឡើយ។ពេលមកពីសាលាវិញត្រូវដាំបាយឲ្យប្អូនប្រុសតូចហូប ក្នុងជីវភាពដ៏លំបាក ជួនគ្មានម្ហូប ជួនបានផ្អក ប្រហុក ពី អ៊ុំអ្នកជិតខាងក្នុងភូមិគេអាណិតផ្តល់ឲ្យក៏មាន។
យកដៃជូតទឹកភ្នែកបន្តិចក្មួយស្រីកំសត់បន្តថាឲ្យតែមេឃចាប់ផ្តើមងងឹតក្មួយទាំង២នាក់ចាប់ផ្តើមក្តុកក្តួលនឹកម្តាយឪពុកនិងលោកយាយធ្លាប់ជួបជុំគ្នា ទោះបីរស់នៅក្នុងខ្ទមកំសត់ជញ្ចាំងបាំងស្លឹក ដំបូលធ្លុះរហែក ក្នុងស្ថានភាពងងឹតឈឹងលឺតែសម្លេងសត្វយំ ពេលយប់បន់ឲ្យតែភ្លឺ ។
ក្មួយស្រីទឹកភ្នែកក្រោយពីបានឃើញក្រុមការងារ TVFB ទៅដល់ ក្មួយថានឹកជីដូន នឹកម្តាយ ពេលមានម៉ែ មានបាយហូប មានប្រាក់ចាយ ហើយពេលយប់ឡើង មិនភ័យក្លាច តែអ្វីដែលក្មួយតក់ស្លុតបំផុតនោះគឺ នៅពេលឃើញរូបភាពម្តាយចង ក សម្លាប់ខ្លួននៅលើដើមឈើមុខផ្ទះ ។
ក្មេងទាំង២អ្វីត្បិតតែរស់នៅក្នុងគ្រួសារក្រីក្រក៏ពិតមែន តែក្មួយៗមានសីលធម៌ណាស់ចេះគោរព ចេះឲ្យពរ ចេះអរគុណពេលដែលគេឲ្យអ្វីមួយ ។ក្រឡេកទៅមើល ក្មួយថាវ ថូវិញឆ្លាតមិនចាញ់បង ស្រីទេ សម្តីណាស់ ចេះសូត្រធម៌ឲ្យពរពេលដែលគេអោយរបស់អ្វីមួយ ក្មួយថាវមានអាយុ៨ឆ្នាំប៉ុន្តែសូត្រធម៌បានល្អណាស់ គឺពួកគាត់ចេះមកពីជីដូនចាស់បង្រៀនកាលគាត់នៅរស់ ។
ដោយក្តីអាណិត និងសង្វែកពន់ពេក ពេលក្រុមការងារ TVFB បានទទួលដំណឹងពីលោកអភិបាលស្រុកពួកនៅម៉ោង៦ល្ងាច ថ្ងៃទី២២ ខែសីហា ឆ្នាំ២០២៤ ក៏បានចុះទៅដល់ផ្ទះក្មួយទាំង២ ឃើញស្ថានភាពហើយនិយាយបានថាតក់ស្លុតណាស់ ព្រោះផ្ទះក្មួយទាំង២នៅចុងភូមិដាច់ពីគេ យប់ឡើងលឺតែសម្លេងសត្វយំ ក្នុងស្ថានភាពងងឹតឈឹងសូន្រ ។
ក្មួយទាំង២បានញញឹមពេលឃើញលោកស្រី នាយិកា TVFBព្រមទាំងក្រុមគ្រួសារ លោកអភិបាលស្រុកពួក មេឃុំដូនកែវទៅដល់ មានជីវិតត្រូវមានសង្ឃឹម ក្នុងនោះលោកស្រីនាយិកាបានជួយឧបត្ថមអង្ករ១បាវ ៥០គីឡូក្រាម ទឹកត្រី ទឹកស៊ីអ៊ីវ នំ និងថវិកា ក្នុងនោះលោកអភិបាលស្រុកពួក ក៏បានជូនថវិកាផងដែរ ។ប៉ុន្តែក្រុមការងារយើងមិនមានអ្វីធំដុំទេ មានតែកម្លាំងមហាជន បើបងប្អូនមានសទ្ធាជួយជីវិតមនុស្សបានបុណ្យណាស់ ១ដុល្លារក្តី ២ដុល្លារក្តី ទម្រាំគ្នាធំដឹងក្តី ៕ អត្តបទដោយ៖ លីណា អាចទំនាក់ទំនងតាមលេខ០១១ ៧៦៣ ០០៧ / ០៧៧ ៣១១ ០០៦
