ភ្នំពេញ៖ ជារឿងហួសចិត្ត ហើយក៏ជាសារឲ្យប្រជាពលរដ្ឋប្រុងប្រយត្ន័ ខណៈបុរសម្នាក់រវល់តែអង្គុយឈ្ងោកអោនមើលព័ត៌មាន កាន់ទូរសព្ទក្នុងដៃភ្លេចខ្លួន ត្រូវបានជនសង្ស័យ២នាក់ ជិះម៉ូតូមកឆក់យកទូរស័ព្ទបានសម្រេចហើយរត់បាត់ កាលពីវេលាម៉ោង ១០ និង៥០នាទីយប់ ថ្ងៃទី១៣ ខែមីនា ឆ្នាំ២០២១ ចំណុចមុខមន្ទីរពេទ្យលោកសង្ឃ ផ្លូវ២៧១ ក្នុងសង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ ។

ជនរងគ្រោះជាម្ចាស់ទូរសព្ទឈ្មោះ កែវ ទូច ភេទប្រុស អាយុ៣២ ឆ្នាំ មុខរបរសង្កត់គ្រឹះ បាននិយាយថា គាត់បានជិះម៉ូតូមួយគ្រឿងម៉ាកស្គុបពី ពណ៌ក្រហម ពាក់ស្លាកលេខ កំពត 2H-2970 ម្នាក់ឯងពីបែកចានមកឌុបបងនៅមន្ទីរពេទ្យលោកសង្ឃ ហើយក៏អង្គុយចាំនៅខាងមុខមន្ទីរពេទ្យ យកទូរស័ព្ទបើកមើលព័ត៌មាន ក៏ត្រូវជនសង្ស័យមានគ្នា២នាក់ ជិះម៉ូតូមួយគ្រឿងម៉ាក XR កង់តឿមិនចាំស្លាកលេខ មកឆក់យកទូរស័ព្ទពីដៃរបស់គាត់ម៉ាកiphone 11pro បានសម្រេច រួចជិះរត់គេចខ្លួនបាត់ស្រមោល ។

សូមបញ្ជាក់ថា ករណីនេះសមត្ថកិច្ចបានមកដល់កន្លែងកើតហេតុដែរ តែជនរងគ្រោះមិនបានទៅដាក់ពាក្យបណ្តឹងនោះទេ៕