ខេត្តកណ្តាល ៖ ម៉ោងកំពុងសម្រាន្តលង់លក់ស្រួល ស្រាប់តែអគ្គិភ័យឆេះលេបត្របាក់ផ្ទះប្រជាពលរដ្ឋ នៅក្នុងឃុំបែកចាន យ៉ាងសន្ធោសន្ធៅអស់ជាច្រើនខ្នង បង្កការភ្ញាក់ផ្អើលខ្លាំង កាលពីវេលាម៉ោង ១២យប់ ឈានចូលថ្ងៃទី២២ ខែឧសភា ឆ្នាំ២០២៥ នៅចំណុចភូមិចក ឃុំបែកចាន ស្រុកអង្គស្នួល ខេត្តកណ្ដាល ។
លោកវរៈសេនីយ៍ឯក មាន សំណាង អធិការ នៃអធិការដ្ឋាននគរបាលស្រុកអង្គស្នួល បានឲ្យដឹងថា អគ្គិភ័យនេះបានឆាបឆេះផ្ទះចំនួន ៣ខ្នងរួមមាន ៖
១/ម្ចាស់ឈ្មោះសួង ស៊ីថុល ភេទប្រុស អាយុ៤១ឆ្នាំ ជនជាតិខ្មែរមានទីលំនៅភូមិចក ឃុំបែកចាន ស្រុកអង្គស្នួល ខេត្តកណ្ដាល ឆេះខូចខាតផ្ទះនិងសម្ភារៈទាំងស្រុងចំនួន០២ខ្នង
-ផ្ទះទំហំ5mx20m ធ្វើពីជញ្ជាំងថ្មប្រក់សង្ក័សី
-ផ្ទះទំហំ5mx20m ធ្វើពីជញ្ជាំងថ្មប្រក់សង្ក័សី
ឆេះខូចខាតម៉ូតូចំនួន០១គ្រឿង ទូរទស្សន៍ចំនួន០១គ្រឿង ទូរស័ព្ទចំនួន០៨គ្រឿង កង់អាគុយ០១គ្រឿង ម៉ូតូ០២គ្រឿង និងសម្ភារៈលក់ដូរ សរុបទឹកប្រាក់ចំនួន ៧០.០០០$(ប្រាំពីរម៉ឺនដុល្លារ)។
២/ ម្ចាស់ឈ្មោះគន់ ស៊ីម ភេទស្រី អាយុ៤៤ឆ្នាំ ជនជាតិខ្មែរ មានទីលំនៅភូមិចក ឃុំបែកចាន ស្រុកអង្គស្នួល ខេត្តកណ្ដាល
+ផ្ទះនិងសំភារះខូចខាតប្រហែល៣០%
-ផ្ទះទំហំ5mx20m ធ្វេីពីជញ្ជាំងថ្មប្រក់សង្ក័សី
ឆេះខូចខាតទូរទស្សន៍ចំនួន០១គ្រឿង ទូរទឹកកក០១គ្រឿង និងសម្ភារៈលក់ដូរម៉ាត២៥០០៛ សរុបទឹកប្រាក់ចំនួន ៣០.០០០$(បីម៉ឺនដុល្លារ)។
លោកវរៈសេនីយ៍ឯក មាន សំណាង អធិការ នៃអធិការដ្ឋាននគរបាលស្រុកអង្គស្នួលបានឲ្យដឹងទៀតថា អគ្គីភ័យនេះបានរលត់១០០% នៅវេលាម៉ោង០៤និង៤០នាទី នាថ្ងៃដដែល ដោយប្រើប្រាស់ រថយន្តពន្លត់អគ្គភ័យ ចំនួន ០៣គ្រឿង ប្រើប្រាស់ទឹកអស់ចំនួន១៣ ឡាន និងប្រើប្រាស់កម្លាំងអន្តរាគមន៍នៃអធិការដ្ឋាននគរបាលស្រុកអង្គស្នួល សហការជាមួយ ប៉ុស្ដិ៍នគរបាលរដ្ឋបាលបែកចាន ប៉ុស្ដិ៍នគរបាលរដ្ឋបាលក្រាំងម្កាក់ ប្រជាកាពារ និងប្រជាពលរដ្ឋ ចំនួន ៧៨នាក់។ ក្នុងនោះក៏មានការអន្តរាគមន៍ពីខាង រថយន្តពន្លត់អគ្គីភ័យ អធិការដ្ឋាននគរបាលស្រុកអង្គស្នួល ចំនួន០២គ្រឿង មនុស្ស៣៥នាក់ ប្រេីប្រាស់ទឹក០៨ឡាន។ រថយន្តពន្លត់អគ្គីភ័យ អធិការដ្ឋាននគរបាលស្រុក កណ្ដាលស្ទឹង ចំនួន០១គ្រឿង កម្លាំង០២នាក់ ប្រើប្រាស់ទឹកអស់ ០៥ឡាន។
ចំណែកមូលហេតុសមត្ថកិច្ចបញ្ជាក់ថា បណ្តាលមកពីឆ្លងចរន្ដអគ្គីសនី ចេញពីផ្ទះរបស់ ម្ចាស់ឈ្មោះសួង ស៊ីថុល តែគ្មាននរណាម្នាក់ រងរបួសនោះទេ ៕នុច
