រាជធានីភ្នំពេញ ៖ យោងតាមផេកផ្លូវការរបស់ នាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ ក្រសួងមហាផ្ទៃ បានឲ្យដឹងថា ដោយអនុវត្តតាមបទបញ្ជារបស់លោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ នៅថ្ងៃទី២៥ ខែឧសភា ឆ្នាំ២០២៥ វេលាម៉ោង០២៖៥៥នាទីទាបភ្លឺ លោកឧត្តមសេនីយ៍ត្រី ប៊ុត វណ្ណារដ្ឋ អនុប្រធាននាយកដ្ឋាន ដឹកនាំកម្លាំងជំនាញនាយកដ្ឋាន ល្បាតក្នុងភូមិសាស្រ្តរាជធានីភ្នំពេញ មកដល់ត្រង់ចំណុចមុខធនាគារអេប៊ីអេ ផ្លូវហាណូយ កែងផ្លូវម៉ុងឬទ្ធី សង្កាត់គោកឃ្លាង ខណ្ឌសែនសុខ រាជធានីភ្នំពេញ ក៏ប្រទះឃេីញជនសង្ស័យម្នាក់បានធ្វេីសកម្មភាពចូលលួចទូរស័ព្ទពីជនរងគ្រោះជាសន្តិសុខយាមធនាគារបានសម្រេច។
ភ្លាមនោះកម្លាំងជំនាញក៏បានធ្វើការឃាត់ខ្លួនបានភ្លាមៗ ជនសង្ស័យមាន ឈ្មោះ ឡុង សិលា ភេទប្រុស អាយុ២៥ឆ្នាំ ជនជាតិខ្មែរ ទីលំនៅមិនពិតប្រាកដ មុខរបរមិនពិតប្រាកដ។
សម្ភារៈដកហូតមាន ទូរស័ព្ទម៉ាក vivo (របស់ជនរងគ្រោះ), សោរទីបលេខ៨ និងដែកសំប៉ែតមុខស្រួច (សម្រាប់កាច់កម៉ូតូ) និង ដែកសម្រាប់គាស់សោរ។
បច្ចុប្បន្ននាយកដ្ឋាននគរបាលព្រហ្មទណ្ឌ កំពុងកសាងសំណុំរឿងទៅអយ្យការអមសាលាដំបូងរាជធានីភ្នំពេញ ដើម្បីចាត់ការតាមនីតិវិធី៕
