ខេត្តកណ្តាល ៖ លោកយាយពិការជើងម្ខាងកំពុងសម្រាន្តជាមួយចៅអាយុ០៧ឆ្នាំ នៅសំយ៉ាបផ្ទះខាងមុខផ្ទះ លឺសំឡេងផ្ទុះផាំងចេញពីក្នុងផ្ទះ ឆេះយ៉ាងសន្ធោសន្ធៅ ។
ហេតុការណ៍នេះបានកើតឡើងកាលពីវេលាម៉ោង ១ និង០៥នាទី ថ្ងៃទី០៥ ខែ មិថុនា ឆ្នាំ២០២៥ ចំណុចភូមិត្រពាំងឈើនាង ឃុំពើក ស្រុកអង្គស្នួល ខេត្តកណ្ដាល ។
សមត្ថកិច្ចនគរបាលស្រុកអង្គស្នួលបានឲ្យដឹងថា ម្ចាស់ផ្ទះដែលត្រូវអគ្គិភ័យឆាបឆេះនេះ មានឈ្មោះ ផាន់ រីម ភេទស្រី អាយុ៦៣ ឆ្នាំ (ពិការជើងឆ្វេង) រស់នៅផ្ទះ ភូមិ ឃុំ កើតហេតុខាងលើ ដោយអគ្គិភ័យនេះបាន ឆេះផ្ទះទំហំ៥m x ៦m ប្រក់ស័ង្កសី ជញ្ជាំងធ្វើពីស័ង្កសី និងស្លឹក ,ម៉ូតូហុងដាគុប០១គ្រឿង ទូខោអាវ០១ និងសម្ភារៈមួយចំនួនទៀត បណ្តាលឱ្យខូចខាតទាំងស្រុង។
សូមបញ្ជាក់ថា មុនពេលកើតហេតុ ម្ចាស់ផ្ទះបានសម្រាកជាមួយចៅប្រុសអាយុ៧ឆ្នាំនៅសំយ៉ាបផ្ទះខាងមុខ បន្ទាប់មកក៏បានលឺ សម្លេងផ្ទុះនៅក្នុងផ្ទះ ហើយក៏មាន អណ្តាតភ្លើងឆេះពីក្នុងរាលចេញមកក្រៅ ។ពេលនោះម្ចាស់ផ្ទះបានស្រែកហៅអ្នកជិតខាងអោយមកជួយពន្លត់ ប្រជាពលរដ្ឋឃើញហេតុការណ៍ បានរាយការណ៍ជូនដល់សមត្ថកិច្ច ។
ក្រោយពីទទួលបានព័ត៌មានបានភ្លាម កម្លាំងប៉ុស្តិ៍ពើក កម្លាំងអន្តរាគមន៍ស្រុក បានចុះទៅដល់កន្លែងកើតហេតុ មានការចូលរួមពីប្រជាការពារ និងប្រជាពលរដ្ឋ សរុបប្រមាណ១៥នាក់ បានធ្វើការពន្លត់អគ្គីភ័យត្រង់ចំណុចខាងលើ រហូតរលត់ទៅវិញ១០០% នៅវេលាម៉ោង០១និង២៥នាទី នាថ្ងៃដដែល ទោះបីជាយ៉ាងណាក្នុងហេតុការណ៍នេះ គ្មាននរណាម្នាក់ រងរបួសនោះទេ ខណៈមូលហេតុសមត្ថកិច្ចបញ្ជាក់ថា បណ្តាលពីទុស្សេខ្សែភ្លើង ៕ នុច
