ភ្នំពេញ ៖ មនុស្សប្រុស ៣នាក់ត្រូវបានរងរបួសធ្ងន់សន្លប់ដូចដឹងនឹងត្រូវបានបងប្អូនប្រជាពលរដ្ឋជួយសង្គ្រោះចលនាបាត់ខំឲ្យដឹងខ្លួនឡើងវិញបន្ទាប់ពីជួបគ្រោះថ្នាក់ចរាចរណ៍រវាងម៉ូតូស្កូពីបើកបោះពួយល្បឿនលឿនមកបុកជាមួយម៉ូតូឌ្រីមសេ125 យ៉ាងពេញទំហឹងស្ថិតនៅតាមបណ្ដោយផ្លូវ 193 កែងនឹងផ្លូវ 384 សិទ្ធិក្នុងសង្កាត់ទួលស្វាយព្រៃទី១ ខណ្ឌបឹងកេងកង នៅវេលាម៉ោង ៣និង២០នាទីរសៀលថ្ងៃទី៣០ ខែឧសភា ឆ្នាំ ២០២១ ។

តាមប្រភពព័ត៌មានពីសមត្ថកិច្ចបានឱ្យដឹងថា នៅមុនពេលកើតហេតុគេបានឃើញម៉ូតូស្គូបពី ពណ៌ក្រហមមួយគ្រឿងមិនមានស្លាកលេខ ជិះដោយបុរសម្នាក់ធ្វើដំណើរក្នុងទិសដៅពីត្បូងទៅជើងតាមបណ្ដោយផ្លូវលេខ ៣៨៤ លុះមកដល់ចំណុចផ្លូវបែកជាបួនកែងនឹងផ្លូវ ១៩៣ មានម៉ូតូឌ្រីមសេ125មួយគ្រឿង ជិះដោយយុវជនពីរនាក់ក្នុងទិសដៅពីកើតមកលិចតាមផ្លូវលេខ១៩៣ ក៏ត្រូវម៉ូតូស្គុបពីបុកយ៉ាងពេញទំហឹង បណ្ដាលឱ្យម៉ូតូឌ្រីមហោះឡើងទៅលើខឿនផ្លូវម្ខាង បណ្តាលឲ្យភាគីទាំងសងខាងរងរបួសធ្ងន់សន្លប់ស្ដូកស្ដឹងទាំង៣នាក់ ចំណែកម៉ូតូទាំងពីរគ្រឿងរងការខូចខាតទាំងសងខាងដូចគ្នា ។ ភ្លាមៗនោះក៏មានបងប្អូនប្រជាពលរដ្ឋដែលរស់នៅជិតនោះបានមកជួយធ្វើចលនាសង្គ្រោះបឋម ទើបធ្វើឱ្យភាគីទាំងសងខាងនោះបានដឹងខ្លួនឡើងវិញ។

ក្រោយកេីតហេតុ ដោយសារតែសភាពមនុស្សរងរបួសធ្ងន់ធ្ងរពេក ក៏ត្រូវគេដឹកយកទៅសង្គ្រោះនៅមន្ទីរពេទ្យ ចំណែកម៉ូតូទាំង២គ្រឿង ត្រូវបានសមត្ថកិច្ចធ្វេីការវាស់វែងយកទៅរក្សាទុកនៅអធិការដ្ឋាននគរបាលខណ្ឌបឹងកេងកង រងចាំការដោះស្រាយគ្នានៅពេលក្រោយ ៕ អ៊ុ ស្រស់