រាជធានីភ្នំពេញ៖ មានករណីគ្រោះថ្នាក់ចរាចរណ៍មួយបានកើតទ្បើង ដោយរថយន្តកុងតឺន័រ មួយគ្រឿង សង្ស័យអ្នកបើកបរងងុយគេង បណ្ដាលឲ្យរេចង្កូត បុករះបង្គោលភ្លើងបំភ្លឺផ្លូវ រួចបុករះកន្លែងលក់ផ្កា ជ្រុលទៅបុកផ្ទះអ្នកលក់អីវ៉ាន់ចាប់ហួយមួយកន្លែងទៀត តែសំណាងល្អមិនបណ្តាលឲ្យអ្នកណាម្នាក់រងរបួសទ្បើយ គ្រាន់តែរងការខូចខាតសម្ភារៈយ៉ាងដំណំ កាលពីវេលាម៉ោង ៤ទៀបភ្លឺថ្ងៃទី៤ ខែមិថុនា ឆ្នាំ២០២១ នៅតាមបណ្ដោយផ្លូវជាតិលេខ១ ក្នុងសង្កាត់ក្បាលកោះ ខណ្ឌច្បារអំពៅ រាជធានីភ្នំពេញ។

ប្រភពព័ត៌មានពីប្រជាពលរដ្ឋ បានបញ្ជាក់ប្រាប់ក្រុមការងារ TVFB បានឲ្យដឹងថា មុនពេលកើតហេតុ គេឃើញរថយន្កកុងតឺន័រ ពាក់ស្លាកលេខ ភ្នំពេញ 3A-6098 ចេញដំណើរពីផែម្តុំអ្នកលឿង បើកបរទិសដៅពីកើតមកលិច លុះមកដល់ចំណុចកើតហេតុខាងលើ សង្ស័យតែកុងរថយន្តងងុយគេង បានរេចង្កូតមកមួយចំហៀងផ្លូវ បណ្ដាលឲ្យបុករះបង្គោលភ្លើងបំភ្លឺផ្លូវចំនួន១ដើម រួចក៏បន្តទៅបុករះកន្លែងលក់សួនផ្កា និងបន្តទៅបុកផ្ទប់ផ្ទះបងប្អូនប្រជាពរដ្ឋមួយកន្លែងទៀត តែសំណាងល្អមិនបណ្ដាលឲ្យមានអ្នកណាម្នាក់រងរបួសឡើយ គ្រាន់តែរងការខូចខាតសម្ភារៈដូចជាបង្គោលភ្លើងបំភ្លឺផ្លូវ និងកន្លែងលក់ផ្កាក៏ដូចជាផ្ទះបងប្អូនប្រជាពរដ្ឋយ៉ាងដំណំ ។

ក្រោយពីកើតហេតុកម្លាំងសមត្ថកិច្ចជំនាញនៃអធិការដ្ឋាននគរបាលខណ្ឌច្បារអំពៅ បានចុះទៅដល់ទីតាំងកន្លែងកើតហេតុបានធ្វើការវាស់វែងយករថយន្តបង្កហេតុខាងលើដើម្បីប្រគល់មកកាន់ការិយាល័យចរាចរផ្លូវគោករាជធានីភ្នំពេញដើម្បីកសាងសំណុំរឿងដោះស្រាយគ្នាទៅតាមផ្លូវច្បាប់៕ អែល មេសា