រាជធានីភ្នំពេញ ៖ មានការភ្ញាក់ផ្អើលខ្លាំងទាំងយប់មួយបានកើតឡើង ខណៈក្មេងស្ទាវមួយក្រុម ប្រដាប់ដោយដាវ បានដេញតាមវាយ និងកាប់កម្ទេចរថយន្ត២គ្រឿង ផ្អើលដល់បងប្អូនប្រជាពលរដ្ឋ និងសមត្ថកិច្ចចុះមកអន្តរាគមន៍ និងមានឮសំឡេងផ្ទុះអាវុធចំនួន ៣ គ្រាប់ទៀតផង កាលពីវេលាម៉ោង១យប់ ឈានចូលថ្ងៃទី៥ ខែមិថុនា ឆ្នាំ២០២១ នៅចំណុចភូមិអូរបែកក្អម សង្កាត់អូរបែកក្អម ខណ្ឌសែនសុខ រាជធានីភ្នំពេញ ។

តាមសម្តីរបស់បុរសម្នាក់ដែលអះអាងថាខ្លួនជាអ្នករងគ្រោះ បាននិយាយរៀបរាប់ប្រាប់ TVFB ថា ខ្លួនបានជិះរថយន្តជាមួយមិត្តភក្កិត្រឡប់មកផ្ទះវិញ មកដល់ចំណុចកើតហេតុ ក៏មានក្រុមក្មេងស្ទាវមួយក្រុម ដេញធាក់ រថយន្តរបស់គាត់តាមផ្លូវ ភ្លាមនោះជនរងគ្រោះ ក៏បានបើករថយន្តបើកចូលទៅក្នុងភូមិមុខផ្ទះរបស់ខ្លួន ស្រាប់តែមានក្រុមជនសង្ស័យ ៤ទៅ ៥ ម៉ូតូ បានធ្វើសកម្មភាពយកដាវកាប់កម្ទេចលើរថយន្ត២គ្រឿង ១គ្រឿងម៉ាករថយន្តព្រូស ពណ៌ស និង១គ្រឿងទៀតម៉ាកឡិចស៊ីស រងការខូចខាតទាំង២គ្រឿង ហើយភ្លាមៗនោះ ក៏មានសមត្ថកិច្ចរបស់ស្នងការនគរបាលរាជធានីភ្នំពេញ បានចុះមកអន្តរាគមន៍ ហើយឮសូរផ្ទុះអាវុធ២គ្រាប់ថែមទៀត ឡើងទៅលើ ឃាត់បានជនសង្ស័យចំនួន ៣ នាក់ បញ្ជូនទៅស្នងការនគរបាលរាជធានីភ្នំពេញទាំងយប់។

ក្រោយកើតហេតុសមត្ថកិច្ចមូលដ្ឋានក៏បានហៅភាគីជនរងគ្រោះទៅដាក់ពាក្យបណ្តឹងនៅប៉ុស្តិ៍នគរបាលអូរបែកក្អម ដើម្បីចាត់ការតាមនីតិវិធីច្បាប់។ ចំណែកឯជនសង្ស័យ ត្រូវបានកកម្លាំងព្រហ្មទណ្ឌកម្រិតស្រាល ឃាត់ខ្លួនជនសង្ស័យទាំង៣នាក់នោះបញ្ជូនទៅស្នងការនគរបាលរាជធានីភ្នំពេញ ភ្លាមៗដើម្បីចាត់ការតាមច្បាប់ ៕