រាជធានីភ្នំពេញ ៖ បុរសម្នាក់ បានស្លាប់ភ្លាមៗយ៉ាងរន្ធត់ និងម្នាក់ទៀត រងរបួសធ្ងន់ ត្រូវបានបញ្ជូនទៅសង្គ្រោះព្យាបាលនៅមន្ទីរពេទ្យ ខណៈកំពុងជិះម៉ូតូតាមដងផ្លូវ ត្រូវបានរថយន្តស៊េរីទំនើបម៉ាក RANGE ROVER បុកពេញទំហឹង កាលពីថ្ងៃទី៥ ខែមិថុនា ឆ្នាំ២០២១ នៅក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។

តាមប្រភពព័ត៌មាននៅកន្លែងកើតហេតុ បានឲ្យដឹងថា មុនពេលកើតហេតុ គេឃើញរថយន្តម៉ាក RANGE ROVER មួយគ្រឿង បើកក្នុងទិសដៅពីត្បូងទៅជើង ។ លុះមកដល់ចំណុចកើតហេតុផ្លូវបំបែកជាបួន ក៏មានម៉ូតូឌ្រីមសេ១២៥ មួយគ្រឿង បើកបរដោយយុវជន២នាក់ ដឹកគ្នាទៅកោះពេជ្រ ក្នុងទិសដៅដៅពីលិចទៅកើត បានបុកគ្នាពេញមួយទំហឹង បណ្ដាលឲ្យម្នាក់ស្លាប់ និងម្នាក់ទៀតរងរបួសធ្ងន់ ត្រូវបានបញ្ជូនទៅសង្គ្រោះព្យាបាលនៅមន្ទីរពេទ្យ ។ ចំណែកអ្នកបើកបររថយន្ត ត្រូវបានសមត្ថកិច្ច ឃាត់ខ្លួនមកធ្វើការសាកសួរ ភ្លាមៗផងដែរ។

ក្រោយកើតហេរតុ សមត្ថកិច្ចនគរបាលចរាចរណ៍មូលដ្ឋាន សហការជាមួយនគរបាលចរាចរណ៍ជំនាញ បានចុះមកធ្វើការវាស់វែង យករថយន្តនិងម៉ូតូទៅរក្សាទុក នៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នាតាមច្បាប់ និងប្រគល់សពឲ្យសាច់ញាតិធ្វើបុណ្យតាមប្រពៃណី ៕