រាជធានីភ្នំពេញ៖ មានការភ្ញាក់ផ្អើលមួយបានកើតឡើង ដោយប្រជាពលរដ្ឋ បានលឺសូរសំឡេងបុកលាន់ដូចរន្ទះ ខណៈរថយន្តស៊េរីទំនើបម៉ាក BMW មួយគ្រឿង បានបើកមក ប្រឡះបង្គោលភ្លើងពេញទំហឹង បាក់អស់ ១ដើម ខ្ទេចរថយន្តយ៉ាងដំណំ កាលពីវេលាម៉ោង ២រំលងអធ្រាត្រ ឈានចូលថ្ងៃទី០៧ ខែ​មិថុនា ឆ្នាំ២០២១ នៅតាមបណ្ដោយផ្លូវ៦១៤ ក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ។

តាមព័ត៌មានពីបងប្អូនប្រជាពលរដ្ឋនៅកន្លែងកើតហេតុបានឲ្យដឹងថា គេបានឃើញរថយន្តស៊េរីទំនើបម៉ាក BMW X3 មួយគ្រឿងបើកក្នុងល្បឿនលឿនតាមបណ្ដោយផ្លូវ ៦១៤ ពីលិចទៅកើត មកដល់ចំណុចកើតហេតុ ក៏រេចង្កូឡើងទៅលើកខឿនផ្ទះប្រជាពលរដ្ឋ ទៅបុកនឹងបង្គោលភ្លើងចំនួន ០១ដើម បណ្ដាលឲ្យបាក់បង្គោលភ្លើងមកសង្កត់លើករថយន្តបណ្ដាលឲ្យរងការខូចខាតយ៉ាងដំណំ ភ្លាមៗនោះសមត្ថកិច្ចមូលដ្ឋានក៏បានមកដល់បានទាក់ទងហៅជំនាញចរាចរណ៍ផ្លូវគោករបស់អធិការនគរបាលខណ្ឌទួលគោក ដើម្បីធ្វើការស្ទូចរថយន្តយកទៅរក្សាទុក នៅអធិការនគរបាលខណ្ឌទួលគោក រង់ចាំម្ចាស់ចូលមកដោះស្រាយទៅតាមផ្លូវច្បាប់ ៕