រាជធានីភ្នំពេញ ៖ រថយន្តដឹកខ្សាច់បើកបរលឿនមិនប្រយ័ត្នជាន់ហ្វ្រាំងមិនស៊ីជ្រុលបុករថយន្តព្រូសមួយគ្រឿង ខណៈកំពុងបើកថយចេញពីចំណតរួចរថយន្តព្រូស ទៅបុកជាមួយនឹងរថយន្តហាយឡែនឌ័រ២គ្រឿងបន្ថែមទៀត ដែលកំពុងចតទុកចោល បង្កការភ្ញាក់ផ្អើលនៅវេលាម៉ោង៣និង៣០នាទីរសៀល ថ្ងៃទី៧ ខែមិថុនា ឆ្នាំ២០២១ ស្ថិតតាមបណ្តោយផ្លូវលេខ៨៤ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។
តាមប្រភពព័ត៌មានបានឲ្យដឹងថា នៅមុនពេលកើតហេតុរថយន្តដឹកខ្សាច់ខាងលើបើកបរដោយបុរសម្នាក់ដោយធ្វើដំណើរតាមផ្លូវលេខ៨៤ ក្នុងទិសដៅពីកើតទៅលិច លុះមកដល់ចំណុចកើតហេតុ ស្រាប់តែមានរថយន្តព្រូសមួយគ្រឿង បានបើកថយចេញពីចំណត ខណៈទើបតែថយបានពាក់កណ្តាល រថយន្តដឹកខ្សាច់វ៉ាក់ជាន់ហ្វ្រាំងមិនស៊ីក៏ជ្រុលទៅបុកចំពេញទំហឹង ក្រវ៉ាត់គូទរថយន្តទៅបន្តបុកប៉ះរថយន្តហាយឡែនឌ័រ ២គ្រឿងទៀត ដែលចតទុកចោលនៅក្បែរនោះ បណ្តាលអោយខូចខាតទាំង៣គ្រឿងយ៉ាងដំណំ ។ បន្ទាប់ពីកើតហេតុរួចមក សមត្ថកិច្ចមូលដ្ឋាននិងសមត្ថកិច្ចផ្នែកចរាចរណ៍បានមកដល់កន្លែងកើតហេតុ ដោយទុកឲ្យភាគីខាងរថយន្តបង្កសម្របសម្រួលគ្នាជាមួយនិងម្ចាស់រថយន្តរងគ្រោះ ប៉ុន្តែដោយសារតែខាងតំណាងរថយន្តដឹកខ្សាច់ម្ចាស់ក្រុមហ៊ុនមិនមកទទួលខុសត្រូវ ក៏សម្រេចឲ្យសមត្ថកិច្ចចរាចរណ៍ធ្វើការវាស់វែងយករថយន្តទាំងអស់ទៅរក្សាទុកនៅការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំការដោះស្រាយគ្នានៅពេលក្រោយបន្តទៀត ៕
