ខេត្តបន្ទាយមានជ័យ៖ ស៊ីឈ្នួលផ្សារដែកធ្វើផ្ទះ លើកដែកមិនប្រយ័ត្នប៉ះខ្សែភ្លើង ឆក់ធ្លាក់ពីលើដំបូលបណ្តាលឲ្យស្លាប់ កាលពីថ្ងៃទី០៦ ខែមិថុនា ឆ្នាំ២០២១ ស្ថិតភូមិអូរអណ្តូងកើត ឃុំបន្ទាយនាង ស្រុកមង្គលបូរី។

លោកវរៈសេនីយ៍ឯក ស៊ិន ណារ៉ាក់ អធិការនគរបាលស្រុកមង្គលបូរីបានប្រាប់ថា៖ ជនរងគ្រោះដែលស្លាប់ដោយឆក់ចរន្តអគ្គីសនីមានឈ្មោះ សៀន ប៊ុនអឿត ភេទប្រុស អាយុ២៩ឆ្នាំ រស់នៅភូមិកើតហេតុខាងលើ។

លោកបានបញ្ជាក់ថា៖ នៅពេលជនរងគ្រោះត្រូវបានឆ្លងចរន្តអគ្គីសនីឆក់ស្លាប់ បានស៊ីឈ្នួលផ្សារដែកធ្វើផ្ទះអ្នកជិតខាង ជាមួយជាង២ទៅ៣នាក់ ហើយពេលកំពុងធ្វើការផ្សារដែកដំបូលលើហើយ បានលើកដែកបម្រុងផ្សារបានប៉ះខ្សែរបណ្តាញភ្លើងធំបណ្តាល ឆក់ធ្លាក់ពីលើដំបូលបណ្តាលសន្លប់ បានបញ្ជូនទៅមន្ទីពេទ្យមិត្តភាពកម្ពុជា-ជប៉ុនមង្គលបូរី បានស្លាប់ហើយដឹកមកផ្ទះវិញ។

លោកវរៈសេនីយ៍ឯក ស៊ិន ណារ៉ាក់ បានបញ្ជាក់ថា៖ ក្រោយទទួលព័ត៌មានកម្លាំងជំនាញបានចុះទៅពិនិត្យសាកសពជនរងគ្រោះពិតជាស្លាប់ដោយឆក់ចរន្តអគ្គីសនីស្លាប់នៅពេលធ្វើការលើកដែកមិនប្រយ័ត្នប៉ះខ្សែបណ្តាញភ្លើងធំបណ្តាលឆក់ស្លាប់ក្រោយពេលពិនិត្យហើយប្រគល់សាច់ញាតិទទួលយកធ្វើបុណ្យតាមប្រពៃណី៕ ដោយ៖ ចិន្ត្រា