ខេត្តបន្ទាយមានជ័យ៖ បុរសចំណាស់ម្នាក់ ធ្លាក់ពីលើភ្នំកម្ពស់ប្រមាណជា៤០ម៉ែត្រ បណ្តាលឲ្យស្លាប់ត្រូវបានគេប្រទះឃើញនៅវេលាម៉ោង៦ព្រឹក ថ្ងៃទី០៧ ខែមិថុនា ឆ្នាំ២០២១ ខាងកើតក្បែរកាដ្ឋានកិនថ្មភ្នំធំ ស្ថិតភូមិភ្នំធំ ឃុំអូរប្រាសាទ ស្រុកមង្គលបូរី ខេត្តបន្ទាយមានជ័យ។
លោក វ៉ា ស៊ិនណារ៉ុង នាយប៉ុស្តិ៍នគរបាលឃុំអូរប្រាសាទបានប្រាប់ថា៖ ជនរងគ្រោះដែលធ្លាក់ពីលើភ្នំស្លាប់មានឈ្មោះ ទៀង រ៉ុម ភេទប្រុសអាយុ៧១ឆ្នាំ រស់នៅភូមិភ្នំធំជើង ឃុំអូរប្រាសាទ ស្រុកមង្កលបូរី។
លោកបានបញ្ជាក់ថា ៖ នៅពេលដែលគេប្រទះឃើញជនរងគ្រោះមានអ្នកឃ្វាលគោកព្រឹកឡើងបានដេញគោឡើងភ្នំស៊ីស្មៅហើយពេលដេញគោដល់ចំណុចកាដ្ឋានកិនថ្មភ្នំធំបានប្រទះឃើញជនរងគ្រោះបានដេកស្លាប់ក្បែរជើងភ្នំដែលមានឈាមពេញមុខហើយរាយការណ៍ជូនចុះទៅពិនិត្យដែលមានមន្ត្រីជំនាញសាកសពជនរងគ្រោះមានស្នាក់ស្នាមរលាត់ឈាមពេញមុខការសន្និដ្ឋានគឺជនរងគ្រោះអាចធ្លាក់ពីលើខ្នងភ្នំកម្ពស់ប្រមាណជា៤០ម៉ែត្រ។
លោក វ៉ា ស៊ិនណារ៉ុង បានបញ្ជាក់ថា៖ តាមសម្តីសាច់ញាតិជនរងគ្រោះបានអោយដឹងថា គឺមុនជនរងគ្រោះស្លាប់គាត់ចាស់កន្លងមកធ្លាប់វង្វេងដើរបាត់ពីផ្ទះ៤ទៅ៥ថ្ងៃទើបរកឃើញ ហើយមុនស្លាប់បានវង្វេងដើរចេញពីផ្ទះបាត់១យប់រកមិនឃើញ លុះព្រឹកឡើងទទួលព័ត៌មានថាជនរងគ្រោះត្រូវធ្លាក់ពីលើភ្នំបណ្តាលឲ្យស្លាប់ ក្រោយពេលមន្ត្រីជំនាញពិនិត្យហើយត្រូវបានប្រគល់សាកសពជូនសាច់ញាតិទទួលយកទៅធ្វើបុណ្យតាមប្រពៃណី៕ ដោយ៖ចិន្ត្រា
