ខេត្តព្រះសីហនុ៖ ស្ត្រីជាប្រពន្ធបានស្លាប់យ៉ាងរន្ធត់ ខណៈប្តីរបួសស្រាល ក្រោយជួបគ្រោះថ្នាក់ចរាចរណ៍ កំពុងជិះម៉ូតូឌុបគ្នាតាមដងផ្លូវ ត្រូវបានរថយន្តម៉ាក KIA ដែលបើកស្របទិសគ្នាបុកពីក្រោយពេញទំហឹង កាលពីវេលាម៉ោង៣ និង១០នាទី រសៀលថ្ងៃទី០៨ ខែមិថុនា ឆ្នាំ២០២១ នៅចំណុចចន្លោះគីឡូម៉ែត្រលេខ ១៨៧-១៨៨ ក្នុងភូមិព្រែកទាល់ ឃុំទឹកថ្លា ស្រុកព្រៃនប់ ខេត្តព្រះសីហនុ។

សមត្ថកិច្ចបានប្រាប់ TVFB ថា ករណីគ្រោះថ្នាក់ចរាចរណ៍នេះ កើតឡើង រវាងរថយន្ត០១គ្រឿង មាកKIA ពណ៌ផ្ទៃមេឃ ពាក់ស្លាកលេខ កំពត២A- ២៣៧៧ ទិសដៅពី ខេត្តកំពត ឆ្ពោះទៅ ខេត្តព្រះសីហនុ (អ្នកបើកបរ គេចខ្លួនបាត់) លុះមកដល់ចំណុចកើតហេតុខាងលើ បានប៉ះបុកជាមួយម៉ូតូមួយគ្រឿង ម៉ាកហុងដាសេ១២៥ ពណ៌ខ្មៅ ពាក់ស្លាកលេខ ១J-១៧៦៩ ក្នុងទិសដៅស្របគ្នា ពេញទំហឹង បណ្តាលឲ្យអ្នកបើកបរម៉ូតូឈ្មោះ ស៊ុន យើ ភេទប្រុស អាយុ៦៦ឆ្នាំ (របួសស្រាល) ត្រូវជាប្តី នឹង អ្នករួមដំណើរឈ្មោះ ស្មាន តៃ ភេទស្រី អាយុ៦៥ឆ្នាំ (ស្លាប់នៅកន្លែងកើតហេតុ) ត្រូវជាប្រពន្ធ។

ជនរងគ្រោះទាំងពីរនាក់មានទីលំនៅភូមិបន្ទាយប្រិយ៍ ឃុំអណ្តូងថ្ម ស្រុកព្រៃនប់ ខេត្តព្រះសីហនុ។

ក្រោយកើតហេតុ សមត្ថកិច្ចបានធ្វើការវាស់វែង យករថយន្តនិងម៉ូតូទៅរក្សាទុកនៅ អធិការដ្ឋាននគរបាលស្រុកព្រៃនប់ រង់ចាំដោះស្រាយគ្នាតាមច្បាប់ និងប្រគល់សពឲ្យក្រុមគ្រួសារធ្វើបុណ្យតាមប្រពៃណី៕