រាជធានីភ្នំពេញ៖ សំណាង១០០០គ្រោះថ្នាក់ មនុស្ស២នាក់ ត្រូវបានប្រជាពលរដ្ឋស្ទុះទៅជួយអូសចេញទាន់ ខណៈម៉ូតូធំរបស់គាត់វិញ ត្រូវបានរថយន្តក្រឡុកស៊ីម៉ង់ត៍ កិនចំពាក់កណ្តាលម៉ូតូពេញទំហឹង កាលពីវេលាម៉ោង១១ យប់ថ្ងៃទី៨ ខែមិថុនា ឆ្នាំ២០២១ នៅចំណុចផ្លូវម៉ុងឬទ្ធី កែងផ្លូវហាន់ណូយ ចំស្ដុបបំបែកជាបួន ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

បើយោងតាមប្រភពព័ត៌មាន ពីជនរងគ្រោះបានឲ្យដឹងថា មុនពេលកើតហេតុ គាត់បានបើកម៉ូតូធំគ្រឿង មួយគ្រឿង ពាក់ស្លាកលេខ ភ្នំពេញ 1GV-4272 បើកមកដល់ស្តុបផ្សារដីហុយ ស្រាប់តែមានរថយន្តប្រភេទក្រឡុកស៊ីម៉ង់ត៍មួយគ្រឿង ពាក់ស្លាកលេខ ភ្នំពេញ 5A-2804 បានបុកគ្នាមួយម៉ូតូគាត់ រួចបើកកិនគាត់ចំពាក់កណ្ដាលម៉ូតូតែម្តង សំណាងល្អ ត្រូវបានបងប្អូនប្រជាពលរដ្ឋនិងអ្នករួមដំណើរជាមួយគាត់ទាញចេញពីក្រោមរថយន្ដ ទាន់ពេលវេលា។

ក្រោយពេលកើតហេតុ សមត្ថកិច្ចបានចុះមកធ្វើការវាស់វែង យករថយន្តនិងម៉ូតូទៅរក្សាទុកសិន ដើម្បីស្អែកឡើងឲ្យភាគីទាំងសងខាង ធ្វើការដោះស្រាយគ្នាបន្តទៀត៕