រាជធានីភ្នំពេញ ៖ មានការភ្ញាក់ផ្អើលមួយបានកើតឡើង ដោយអគ្គិភ័យបានឆាបឆេះផ្ទះជាន់ឡៅតឿមួយកន្លែង យ៉ាងសន្ធោសន្ធៅ ខណៈម្ចាស់កំពុងតែសម្រាន្តលក់ជាមួយកូនៗ កាលពីវេលាម៉ោង៣ ទៀបភ្លឺ ឈានចូលថ្ងៃទី១១ ខែមិថុនា ឆ្នាំ២០២១ នៅចំណុចផ្លូវ៤៨០ កែងផ្លូវ២៧១ ក្នុងសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។

បើតាមព័ត៌មានបឋមពីម្ចាស់ផ្ទះបានប្រាប់ TVFB ឱ្យដឹងថា មុនពេលកើតហេតុ គាត់បានសម្រាន្តលង់លក់ជាមួយកូនរបស់គាត់ ៣នាក់នៅក្នុងផ្ទះ ស្រាប់តែមានអណ្ដាតភ្លើងឆាបឆេះ ចេញពីជាន់ឡៅតឿ បង្កឲ្យមានការភ្ញាក់ផ្អើលយ៉ាងខ្លាំង ដល់បងប្អូនប្រជាពលរដ្ឋ នាំគ្នាជួយគ្នាម្នាក់មួយដៃ មួយជើង និងប្រញាប់រាយការណ៍ជូនសមត្ថកិច្ចពន្លត់អគ្គិភ័យ ។

ភ្លាមៗគេឃើញរថយន្តពន្លត់អគ្គិភ័យជាច្រើនគ្រឿងបានចុះមកធ្វើការបាញ់ពន្លត់ ប្រើប្រាស់ទឹកអស់១ឡាន ទើបរលត់ទៅវិញទាំងស្រុង មិនបណ្តាលឲ្យឆេះរាលដាលដល់ផ្ទះទាំងមូលនោះទេ ៕