រាជធានីភ្នំពេញ ៖ ក្រុមជនសង្ស័យជាចោរចំនួន២នាក់ ត្រូវបាននគរបាលខណ្ឌច្បារអំពៅទី២ សហការជាមួយនគរបាលខណ្ឌចំការមន ចាប់ខ្លួនបាន ខណៈបក្ខពួក២នាក់ទៀត រត់គេចខ្លួនបាត់ ក្រោយពួកគេ បានធ្វើសកម្មភាព លួចម៉ូតូរបស់មន្ត្រីនគរបាលម្នាក់ បានសម្រេច រួចជិះរត់ទៅដោះស្លាកលេខ ន.ប ចេញ ហើយសម្ងំលាក់ខ្លួន កាលពីវេលាម៉ោង ១១និង៣០នាទី យប់ថ្ងៃទី០៩ ខែមិថុនា ឆ្នាំ២០២១ នៅចំណុចមុខផ្ទះលេខ១១៧ ផ្លូវ ៣៦៩ ភូមិដើមចាន់ សង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ និងឃាត់ខ្លួនបាននៅថ្ងៃទី១០ ខែមិថុនា ឆ្នាំ២០២១ ក្នុងខណ្ឌចំការមន ។

សមត្ថកិច្ចបានប្រាប់ក្រុមការងារ TVFB ឲ្យដឹងថា ជនរងគ្រោះឈ្មោះ ណប វិរៈ ភេទ ប្រុស អាយុ ៤៨ឆ្នាំ ជនជាតិខ្មែរ មុខរបរ នគរបាល ស្នាក់នៅផ្ទះកើតហេតុ។ ចំណែក ជនសង្ស័យឃាត់ខ្លួនចំនួន ០២នាក់ ៖

១-ឈ្មោះ វង់ សុភា ភេទ ប្រុស អាយុ ១៩ឆ្នាំ ជនជាតិ ខ្មែរ មុខរបរ មិនពិតប្រាកដ។

២-ឈ្មោះ ប៉េត ណេត ភេទ ប្រុស អាយុ ២៨ឆ្នាំ ជនជាតិ ខ្មែរ មុខរបរ មិនពិតប្រាកដ។ ( ស្នាក់នៅបន្ទប់ជួលលេខ០៣ ផ្លូវ សុធារស់ ភូមិ៩ សង្កាត់ទន្លេបាសាក់ ខណ្ឌចំការមន )។

តាមរបាយការណ៍ពីសមត្ថកិច្ច ដែលក្រុមការងារ TVFB ទទួលបាន បានបញ្ជាក់ថា មុនពេលកើតហេតុជនរងគ្រោះទុកម៉ូតូម៉ាក KEE WAY-TX ពណ៌ខ្មៅ ផ្លាកលេខ ន.ប ១-៧៩៤៣ នៅចំណុចកើតហេតុ ដោយពុំបានចាក់សោរកម៉ូតូទេ រួចក៏ចូលដេកក្នុងផ្ទះ ស្រាប់តែមានជនសង្ស័យចំនួន០៤នាក់ មានឈ្មោះ ប៉េត នេត, ឈ្មោះ វង់ សុភា, ឈ្មោះ អ៊ឹម និងឈ្មោះ ម៉ាយ ជិះម៉ូតូ០២គ្រឿងមកឈប់ក្បែរកន្លែងកើតហេតុ រួចនាំគ្នាធ្វើ សកម្មភាពលួចម៉ូតូជនរងគ្រោះនាំគ្នាជិះគេចខ្លួនដោះផ្លាកលេខ (ន.ប ១-៧៩៤៣) ទៅលាក់ទុកក្នុងបន្ទប់ជួលជនសង្ស័យ ស្នាក់នៅ (បន្ទប់ជួលលេខ៣ ផ្លូវ សុធារស់ ភូមិ៩ សង្កាត់ទន្លេបាសាក់ ខណ្ឌចំការមន)។

របាយការណ៍ដដែលបន្តថា លុះដល់ថ្ងៃទី ១០-០៦-២០២១ ម៉ោង៧និង២០នាទីយប់ សមត្ថកិច្ចនគរបាលខណ្ឌច្បារអំពៅ សហការណ៍ជាមួយសមត្ថកិច្ចខណ្ឌចំការមន ធ្វើការឃាត់ខ្លួន បានជនសង្ស័យ០២នាក់ ឈ្មោះ វង់ សុភា និងឈ្មោះ ប៉េត ណេត នៅចំណុចបន្ទប់ជួលខាងលើ និងដកហូតម៉ូតូ០១គ្រឿង ម៉ាកខាងលើ (ជារបស់ជនរងគ្រោះ) ហើយត្រួតពិនិត្យក្នុងបន្ទប់ជួលជនសង្ស័យស្នាក់នៅរកឃើញវត្ថុតាងបន្ថែមទៀតរួមមាន ៖ ផ្លាកលេខម៉ូតូចំនួន០២ (ន.ប ១-៧៩៤៣, សៀមរាប ១A-១៤៧៧), ដាវ០២ដើម, សោរខ្សៀលេខ៨ចំនួន០២ និងដែក កែច្នៃចុងស្រួចសម្រាប់កាច់សោរកម៉ូតូចំនួន០២ រួចបញ្ជូនមកអធិការដ្ឋាននគរបាលខណ្ឌច្បារអំពៅ ចាត់ការតាមច្បាប់។ ចំណែកជនសង្ស័យឈ្មោះ អ៊ឹម និងឈ្មោះ ម៉ាយ នាំគ្នាគេចខ្លួនបាត់ ៕