រាជធានីភ្នំពេញ ៖ មានការភ្ញាក់ផ្អើលមួយបានកើតឡើង ខណៈស្រ្តីម្នាក់បានជិះម៉ូតូស្របទិសគ្នាជាមួយរថយន្ត ហើយត្រូវបានរថយន្តក្រឡុកស៊ីម៉ងត៍មួយគ្រឿង បានបើកបុកម៉ូតូជនរងគ្រោះពីក្រោយ កិនអូសជិត១០ម៉ែត្រ បណ្តាលឲ្យស្រ្តីអ្នកជិះម៉ូតូរងរបួសជើងឆ្វេងយ៉ាងធ្ងន់ធ្ងរ ត្រូវបានសមត្ថកិច្ចបញ្ជូនទៅសង្គ្រោះបន្ទាន់នៅមន្ទីរពេទ្យ កាលពីវេលាម៉ោង ១២ និង៣០នាទី ថ្ងៃទី១១ ខែមិថុនា ឆ្នាំ២០២១ នៅចំណុចច្រមុះជ្រូកក្បាលថ្នល់ តាមបណ្ដោយផ្លូវព្រះមុនីវង្ស ក្នុងសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ។

តាមប្រភពព័ត៌មានពីមន្ត្រីនគរបាលចរាចរណ៍ដែលឈរជើងនៅគោលដៅកន្លែងកើតហេតុបានប្រាប់ក្រុមការងារTVFB ឲ្យដឹងថា មុនពេលកើតហេតុ គេឃើញស្ត្រីម្នាក់វ័យប្រហែល៤០ឆ្នាំ ជិះម៉ូតូមួយគ្រឿងម៉ាក ហុងដាឌ្រីម ស៊េរី២០១៤ ពណ៌ខ្មៅ ធ្វើដំណើរតាមបណ្តោយផ្លូវព្រះមុនីវង្ស ទិសដៅពីលិចមកកើត ខណៈមកដល់ចំណុចកើតហេតុក៏បានឈប់ចាំស្តុក ស្រាប់តែក៏មានរថយន្តក្រឡុកស៊ីម៉ងត៍មួយគ្រឿង ពណ៌ស បើកបរដោយបុរសម្នាក់ធ្វើដំណើរមកពីក្រោយ មកបុកយ៉ាងពេញទំហឹងពីក្រោយម៉ូតូជនរងគ្រោះ មិនទាន់អស់ល្បឿនក៏បត់មកឆ្វេងមកកិនម៉ូតូអូសជិត១០ម៉ែត្រ បន្តមកកិនចំជើងស្ត្រីរងគ្រោះខាងឆ្វេងបណ្តាលឲ្យចង់ដាច់ជាពីរ រងរបួសយ៉ាងធ្ងន់ធ្ងរ ។ ភ្លាមនោះសមត្ថកិច្ចដែលឈរជើងនៅគោលដៅកន្លែងកើតហេតុក៏បានឃាត់ខ្លួនតៃកុងរថយន្តបង្កបញ្ចូនទៅកាន់អធិការដ្ឋាននគរបាលខណ្ឌចំការមន ។ ចំណែកឯស្ត្រីរងគ្រោះត្រូវបានកម្លាំងសមត្ថកិច្ចបានទាក់ទងរថយន្តសាមុយឲ្យមកបញ្ជូនយកទៅសង្គ្រោះ ។

ក្រោយពីកើតហេតុកម្លាំងសមត្ថកិច្ចមូលដ្ឋានបានទាក់ទងទៅខាងសមត្ថកិច្ចជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ចុះមកធ្វើការវាស់វែងយកទៅរក្សាទុក ដើម្បីរង់ចាំដោះស្រាយនៅពេលក្រោយ តាមច្បាប់បន្តទៀត៕