រាជធានីភ្នំពេញ ៖ រថយន្តស៊េរីទំនើបមួយគ្រឿង បុកគ្នាជាមួយនឹងរថយន្តដឹកដីពេញមួយទំហឹង ខូចខាតយ៉ាងដំណំ នៅតាមបណ្ដោយផ្លូវ 60 ម៉ែត្រដែលស្ថិតនៅក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ កាលវេលាម៉ោង១១ និង២០នាទីយប់ ថ្ងៃទី១៣ ខែមិថុនា ឆ្នាំ២០២១ ។

បើយោងតាមប្រភពព័ត៌មានពីបងប្អូនប្រជាពលរដ្ឋ និងសមត្ថកិច្ចមូលដ្ឋាន បាននិយាយថា មុនពេលកើតហេតុ គេបានឃើញរថយន្តស៊េរីទំនើបមួយគ្រឿង ពណ៌ខ្មៅ ពាក់ស្លាកលេខ ភ្នំពេញ 2AM- 1199 បើកក្នុងទិសដៅពីជើងទៅត្បូង លុះមកដល់ចំណុចកើតហេតុ ក៏បានបុកគ្នាជាមួយនឹងរថយន្តដឹកដីមួយគ្រឿងដែលពាក់ស្លាកលេខ ពោធិ៍សាត់ 3A-1149 បានឆ្លងកាត់ពីមុខបណ្ដាលឲ្យបុកគ្នាពេញមួយទំហឹងនៅត្រង់ចំណុចផ្លូវ៦០ម៉ែត្រ ភ្លាមនោះសមត្ថកិច្ចចរាចរណ៍លើគោកក៏បានមកដល់ធ្វើការវាស់វែងយករថយន្តទាំង២គ្រឿង យកទៅរក្សាទុកនៅឯការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំភាគីទាំងសងខាងចូលដោះស្រាយគ្នាទៅតាមផ្លូវច្បាប់ ៕