រាជធានីភ្នំពេញ ៖ យ៉ាងហោចណាស់បុរសម្នាក់ដែលជាអ្នកជិះនៅខាងក្រោយ បានផ្លោងបោកជាមួយនឹងកញ្ចក់រថយន្តស្លាប់ភ្លាមៗយ៉ាងរន្ធត់បំផុត ខណៈដែលអ្នកបើកបរម្នាក់ទៀតរងរបួសធ្ងន់ ពេលកំពុងជិះម៉ូតូធំតាមដងផ្លូវ បានបុកជាមួយនឹងរថយន្តម៉ាកស្តារិច ដែលកំពុងបើកបរបញ្ច្រាសទិសគ្នាពេញទំហឹងលាន់ដូចរន្ទះ បង្កការភ្ញាក់ផ្អើលយ៉ាងខ្លាំងកាលពីវេលាម៉ោង ២រសៀលថ្ងៃទី ១៣ ខែមិថុនាឆ្នាំ ២០២១ នៅចំណុចផ្លូវជាតិលេខ១ ក្នុងឃុំគគីរ ស្រុកកៀនស្វាយ ខេត្តកណ្ដាល។

តាមប្រភពព័ត៌មានពីបងប្អូនប្រជាពលរដ្ឋ បានប្រាប់TVFB ឲ្យដឹងថា មុនពេលកើតហេតុ គេបានឃើញម៉ូតូធំខាងលើជិះឌុបគ្នាដោយបុរស២ នាក់នៅក្នុងទិសដៅពីភ្នំពេញឆ្ពោះទៅកាន់អ្នកលឿង លុះដល់ចំណុចកើតហេតុ ទំនងជាបើកបរនៅក្នុងការវ៉ាជែង បានជ្រុលទៅបុកជាមួយនឹងរថយន្តម៉ាកស្តារិចមួយគ្រឿង ដែលបើកបរនៅក្នុងទិសដៅបញ្ច្រាសទិសគ្នា ពីអ្នកលឿងឆ្ពោះមកកាន់ភ្នំពេញវិញ លាន់ដូចរន្ទះពេញទំហឹង បណ្ដាលឲ្យអ្នកដែលអង្គុយនៅខាងក្រោយ បោកផ្ទប់ជាមួយនឹងកញ្ចក់រថយន្តស្លាប់ភ្លាមៗយ៉ាងរន្ធត់បំផុត និងអ្នកដែលបើកបរម៉ូតូនោះ គឺរងរបួសធ្ងន់ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ ។ ចំណែកឯអ្នកបើកបររថយន្តម៉ាកស្តារិចវិញ គឺបានចុះពីលើរថយន្តរត់គេចខ្លួនបាត់ស្រមោលតែម្ដង។

ក្រោយកើតហេតុគេឃើញសមត្ថកិច្ចនគរបាលជំនាញចរាចរណ៍ស្រុកកៀនស្វាយ ខេត្តកណ្ដាល បានចុះមកធ្វើការវាស់វែងនៅទីតាំងកើតហេតុ ដោយបានយករថយន្តរួមនិងម៉ូតូយកទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តកណ្ដាល ដើម្បីដោះស្រាយគ្នានៅពេលក្រោយតាមផ្លូវច្បាប់បន្តទៀត និងប្រគល់សពឲ្យក្រុមគ្រួសារធ្វើបុណ្យតាមប្រពៃណី ៕