រាជធានីភ្នំពេញ៖ ជនសង្ស័យម្នាក់ ត្រូវបានសមត្ថកិច្ចប៉ុស្តិ៍នគរបាលបឹងទំពុនទី២ ដឹកនាំដោយលោក វរៈសេនីយ៍ត្រីឃុន ឡេង នាយនគរបាលប៉ុស្តិ៍ ធ្វើការឃាត់ខ្លួនបាន ក្រោយធ្វើសកម្មភាពលួចម៉ូតូម៉ាក Zoomer-X របស់អ្នកជួលផ្ទះជិតបន្ទប់គ្នា យកមកលាក់ទុកក្នុងបន្ទប់របស់ខ្លួន កាលពីវេលាម៉ោង៨ និង៤៥នាទី ថ្ងៃទី១៣ ខែមិថុនា ឆ្នាំ២០២១ នៅចំណុចក្រុមទី៤ ភូមិក្បាលទំនប់ ៣ សង្កាត់បឹងទំពន់ទី២ ខណ្ឌមានជ័យ រាជធានីភ្នំពេញ។

សមត្ថកិច្ចបានឲ្យដឹងថា ជនសង្ស័យដែលឃាត់ខ្លួនបាន មានឈ្មោះ លឹម ទិត្យតុលា ភេទប្រុស អាយុ២៣ ឆ្នាំ ជនជាតិខ្មែរ មុខរបរ ជានិស្សិត ស្នាក់នៅផ្ទះជួលផ្លូវ៦៩BT ភូមិក្បាលទំនប់៣ សង្កាត់បឹងទំពន់ទី២ ខណ្ឌមានជ័យ រាជធានីភ្នំពេញ។ ចំណែកជនរងគ្រោះមានឈ្មោះ ចាន់ ឡងឌី ភេទប្រុស អាយុ ២៨ឆ្នាំ មុខរបរនិស្សិត ស្នាក់នៅចំណុចជាប់បន្ទប់របស់ជនសង្ស័យ ។

បើតាមសម្តីរបស់ជនរងគ្រោះ បានប្រាប់ឲ្យដឹងថា មុនពេលកើតហេតុ គាត់បានទុកម៉ូតូម៉ាក Zoomer-X បញ្ឈរមុខបន្ទប់ដូចរាល់ដង ស្រាប់តែចេញមក បាត់ម៉ូតូ មិនដឹងអ្នកណាលួចនោះទេ ទើបសុំម្ចាស់ផ្ទះមើលកាមេរ៉ាសុវត្ថិភាព ក៏ឃើញជនសង្ស័យដែលរស់នៅបន្ទប់ជិតគ្នា លួចបណ្តើរចួលបន្ទប់របស់ហើយចាក់សោរសម្ងំលាក់ខ្លួន ទើបរាយការណ៍ជូនសមត្ថកិច្ច ណិងឃាត់ខ្លួនជនសង្ស័យខាងលើ យកកកាន់ប៉ុស្តិ៍រដ្ឋបាលសង្កាត់បឹងទំពុនទី២ ធ្វើការសាកសួរ និងបញ្ជូនខ្លួនទៅកាន់អធិការដ្ឋាននគរបាលខណ្ឌមានជ័យ ដើម្បីកសាងសំណុំរឿងបញ្ជូនខ្លួនទៅកាន់តុលាការ ចាត់ការតាមច្បាប់បន្តទៀត ៕ មេសា