ខេត្តបន្ទាយមានជ័យ៖ ព្រោះតែជីវភាព ស្ត្រីចំណាស់ម្នាក់ដើររាវខ្យងខ្ចៅតាមប្រឡាយ បណ្តាលឲ្យលង់ទឹកប្រឡាយស្លាប់ ត្រូវបានប្រទះឃើញសាកសព នៅវេលាម៉ោង៤ និង៣០នាទីល្ងាច ថ្ងៃទី១៣ ខែមិថុនា ឆ្នាំ២០២១ នៅវាលស្រែ ក្នុងភូមិ.ឃុំសំរោង ស្រុកអូរជ្រៅ។
លោកវរៈសេនីយ៍ឯក សេស វីបុល អធិការនគរបាលស្រុកអូរជ្រៅ បានប្រាប់ថា៖ ស្ត្រីចំណាស់លង់ទឹកស្លាប់ឈ្មោះ យិង យឿង អាយុ៦៧ឆ្នាំ រស់នៅភូមិកើតហេតុខាងលើ។
លោកបានបញ្ជាក់ថា៖ ស្ត្រីចំណាស់រងគ្រោះលង់ទឹកស្លាប់ ព្រោះតែជីវភាពជួបការលំបាក លោកយាយបានដើរាវខ្យងនិងខ្ចៅរាល់ថ្ងៃធ្វើម្ហូប ហើយថ្ងៃណាបានច្រើនយកទៅលក់បានលុយទិញអង្ករនិងម្ហូប តែអកុសល លោកយាយបានទៅរាវខ្យងនិងខ្ចៅតាមប្រឡាយដែលចេញពីផ្ទះម៉ោង៨ព្រឹករហូតដល់ម៉ោង៤និង៣០នាទីល្ងាចមិនឃើញត្រឡប់មកផ្ទះវិញសាច់ញាតិបានទៅតាមរកប្រទះឃើញ លង់ទឹកប្រឡាយស្លាប់អណ្តែតទឹកទៅហើយ។
លោកវរៈសេនីយ៍ ឯក សេស វីបុល បានបញ្ជាក់ថា៖ ក្រោយទទួលព័ត៌មានមានស្ត្រីរងគ្រោះស្លាប់ សមត្ថកិច្ចបានទៅពិនិត្យសាកសព និងប្រគល់ឲ្យសាច់ញាតិទទួលធ្វើបុណ្យតាមប្រពៃណី ៕ដោយ៖ចិន្ត្រា
