រាជធានីភ្នំពេញ ៖ មានការភ្ញាក់ផ្អើលទាំងព្រឹកមួយបានកើតឡើង ដោយមានកម្មករសំណង់ម្នាក់ បានធ្លាក់ពីលើអគារជាន់ទី៦ នៃការដ្ឋានសំណង់មួយកន្លែង ធ្លាក់ចុះមកក្រោមស្លាប់យ៉ាងរន្ធត់នៅលើផ្លូវ ផ្អើលដល់សមត្ថកិច្ចចុះមកធ្វើការពិនិត្យ កាលពីវេលាម៉ោង ៩ និង៣០នាទី ថ្ងៃទី១៧ ខែមិថុនា ឆ្នាំ២០២១ នៅចំណុចអគារសាងសង់ដីឡូត៍លេខ១១០ ផ្លូវលេខ៣៧៦ ភូមិ៥ ក្រុម៤ ផ្លូវលេខ៣៧៦ កែង២០៥ សង្កាត់បឹងកេងកង៣ ខណ្ឌបឹងកេងកង រាជធានីភ្នំពេញ។

បើតាមរបាយការណ៍របស់សមត្ថកិច្ច ដែលក្រុមការងារ TVFB ទទួលបាន បានបញ្ជាក់ថា ជនរងគ្រោះដែលស្លាប់ មានឈ្មោះ សែម វិបុល ភេទប្រុស អាយុ២០ឆ្នាំ មុខរបរ កម្មករសំណង់ ហើយមុនពេលកើតហេតុ មានកម្មករផ្សេងទៀតបានឃើញ ជនរងគ្រោះឡើងផ្សារដំបូល ខណៈនោះមិនដឹងយ៉ាងម៉េចស្រាប់តែធ្លាក់ចុះមកក្រោម ស្លាប់តែម្តង។

របាយការណ៍ដដែលបញ្ជាក់ថា តាមការសន្និដ្ឋាន របស់លោកគ្រូពេទ្យយកសំណាកបញ្ជាក់ថា សពគ្មានវិជ្ជមានកូវិដ និង តាមការធ្វើកោសល្យវិច័យ របស់ប៉ូលិសបច្ចេកទេស រាជធានីភ្នំពេញ បញ្ជាក់ថា សព ស្លាប់ដោយសារ ប៉ះពាល់ក្បាល និងខ្លួនធ្ងន់ធ្ងរ រួចបានប្រគល់ឲ្យក្រុមគ្រួសារ យកទៅតម្កល់ទុកនៅវត្តចាក់អង្រែក្រោម ដើម្បីធ្វើបុណ្យតាមប្រពៃណី៕ មេសា