រាជធានីភ្នំពេញ ៖ ជនសង្ស័យម្នាក់ជិះម៉ូតូ ធ្វើសកម្មភាពឆក់ទូរស័ព្ទដៃ ពីនារីម្នាក់បានសម្រេចពីផ្លូវ៥០ម៉ែត្រ ក៏ជនសង្ស័យជិះរត់គេច ក្នុងល្បឿនលឿនជ្រុលទៅបុកនិងរថយន្ត ដែលបត់ឆ្លងផ្លូវយ៉ាងពេញទំហឹងបណ្តាលឲ្យជនសង្ស័យខាងលើរងរបួសយ៉ាងធ្ងន់ធ្ងរ ត្រូវបានរថយន្តសង្រ្គោះរបស់មន្ទីរពេទ្យឯកជនដឹងយកទៅសង្គ្រោះ ។

ហេតុការណ៍នេះដែលបានកើតឡើងកាលពីវេលា ម៉ោង១០និង០០នាទីព្រឹកថ្ងៃទី១៨ ខែមិថុនា ឆ្នាំ២០២១ ស្ថិតនៅតាមបណ្តោយផ្លូវ៥០ម៉ែត្រ ភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ។

តាមប្រភពព័ត៌មានពីសមត្ថកិច្ចបានបញ្ចាក់ប្រាប់ក្រុមការងារ TVFB បានឲ្យដឹងថា មុនពេលកើតហេតុជនសង្ស័យ បានជិះមួយគ្រឿង ម៉ាកស៊ុយស៊ុគីនិចមួយគ្រឿង ពណ៌ស ពាក់ផ្លាកលេខភ្នំពេញ1GP-4967 ធ្វើសកម្មភាពឆក់ទូរស័ព្ទម៉ាកVIVO ពីស្ត្រីម្នាក់ឈ្មោះ ចិន្តា អាយុ៣៤ឆ្នាំ បានសម្រេច ហើយជនសង្ស័យ ក៏បានជិះម៉ូតូរត់គេចខ្លួនតែសំណាងអាក្រក់ បានជួបគ្រោះថ្នាក់ចរាចរណ៍ ដោយបុកជាមួយរថយន្តព្រុសមួយគ្រឿង យ៉ាងពេញទំហឹងដែលបម្រុងនឹងបត់ឆ្វេង ចូលបុរីមួយកន្លែង បណ្តាលឲ្យជនសង្ស័យរងរបួសធ្ងន់បាក់ជើងខាងស្តាំ និងបែកមុខបែកមាត់ ត្រូវបានបញ្ជូនតាមរថយន្តសាមុយ របស់មន្ទីរពេទ្យដឹក យកទៅធ្វើការសង្រ្គោះភ្លាមៗផងដែរ ។

ក្រោយពេលកើតហេតុ សមត្ថកិច្ចជំនាញចរាចរណ៍ខណ្ឌដង្កោ បានសហការជាមួយកម្លាំងជំនាញព្រហ្មទណ្ឌ បើកការស្រាវជ្រាវ និងបានទទួលពាក្យបណ្តឹង ពីជនរងគ្រោះដែលជាម្ចាស់ទូរស័ព្ទ និងបានប្រគល់ទូរស័ព្ទដៃខាងលើមកជូនជនរងគ្រោះវិញ ។

បច្ចប្បន្នជនសង្ស័យ ខាងលើកំពុងស្ថិតនៅមន្ទីរពេទ្យ និងបន្តបន្តនីតិវិធីចាត់ការតាមច្បាប់៕