អន្តរជាតិ៖ សារព័ត៌មាន Bangkok Post បានចេញផ្សាយនៅថ្ងៃទី២៨ ខែមិថុនា ឆ្នាំ២០២១ បានឲ្យដឹងថា រដ្ឋាភិបាលបាននិយាយថា ការបិទខ្ទប់ទូទាំងប្រទេសរបស់ ម៉ាឡេស៊ី ដែលគ្រោងនឹងផុតកំណត់នៅថ្ងៃច័ន្ទ កំពុងត្រូវបានបន្ត ដោយគ្មានការកំណត់។

រដ្ឋមន្រ្តីក្រសួងការពារជាតិ លោក Ismail Sabri Yaakob បាននិយាយនៅក្នុងសេចក្តីថ្លែងការណ៍ ដែលបានចេញផ្សាយកាលពីល្ងាចថ្ងៃអាទិត្យ ថា«លក្ខខណ្ឌនានា មិនត្រូវបានឆ្លើយតបទេ សម្រាប់ការបន្ធូរបន្ថយវិធានការទប់ស្កាត់»។

ក្នុងរយៈពេលមួយសប្តាហ៍កន្លងមកនេះ ប្រទេសម៉ាឡេស៊ីបានបញ្ជាក់ថា មានករណីឆ្លងវីរុសថ្មីចំនួន ៥.០០០ ករណីនិងការស្លាប់ទ្វេដងក្នុងមួយថ្ងៃ។ ក្នុងនោះ មានតែ ៦,៤ភាគរយ នៃប្រជាជន បានបញ្ចប់វ៉ាក់សាំងចំនួនពីរលើកគិតត្រឹមថ្ងៃអាទិត្យ។

រដ្ឋាភិបាលបាននិយាយថា វិធានការណ៍នៃការបិទខ្ទប់នឹងត្រូវបានបន្ធូរបន្ថយនៅពេលដែលករណី Covid-19 ប្រចាំថ្ងៃធ្លាក់ចុះក្រោមមធ្យម ប្រចាំសប្តាហ៍ចំនួន ៤.០០០នាក់ ហើយការផ្តល់លក្ខខណ្ឌផ្សេងទៀត ក៏ត្រូវបានលុបចោលផងដែរ។

កំឡុងពេលនៃការបិទខ្ទប់ មានតែផ្នែកផលិតកម្មនិងសេវាកម្មចាំបាច់ប៉ុណ្ណោះ ដែលត្រូវបានអនុញ្ញាតឱ្យដំណើរការ និងផ្សារទំនើប សាលារៀននិងសួនសាធារណៈត្រូវបានបិទ។

ការធ្វើដំណើររបស់ប្រជាជនក៏ត្រូវបានរឹតត្បិតផងដែរ ដោយមានតែមនុស្សពីរនាក់ប៉ុណ្ណោះក្នុងមួយគ្រួសារ ត្រូវបានអនុញ្ញាតឱ្យចេញទៅក្រៅ ហើយការធ្វើដំណើររវាងរដ្ឋនិងស្រុកនៅក្នុងប្រទេសត្រូវបានហាមឃាត់។

នេះជាការបិទខ្ទប់លើកទី ២របស់ប្រទេស ក្នុងកំឡុងពេលមានជំងឺរាតត្បាត បន្ទាប់ពីកើតមានរវាងខែមីនានិងឧសភាឆ្នាំមុន នៅពេលដែលព្រំដែនត្រូវបានបិទហើយសេដ្ឋកិច្ចបានបញ្ឈប់ ៕

ប្រភព៖ Bangkok Post ប្រែសម្រួល៖ នង ណារិន