ក្រុងព្រះសីហនុ៖ បុរសម្នាក់ បានរងរបួសធ្ងន់ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ ខណៈជិះម៉ូតូតាមដងផ្លូវ ត្រូវបានរថយន្តកូរ៉េមួយគ្រឿងបុកពេញទំហឹង កាលពីវេលាម៉ោង ៧និង៣០នាទីយប់ ថ្ងៃទី១៨ ខែមីនា ឆ្នាំ២០២១ តាមបណ្ដោយផ្លូវ CT នៅជិតការ៉ាសសាំងPTT CT ស្ថិតក្នុងសង្កាត់០២ ក្រុងព្រះសីហនុ ខេត្តព្រះសីហនុ។

យោងតាមសម្ដីរបស់បងប្អូនប្រជាពលរដ្ឋដែលបានឃើញហេតុការណ៍ បានប្រាប់ភ្នាក់ងារយកព័ត៌មាន TVFB ឲ្យដឹងថា មុនពេលកើតហេតុ បានឃើញបុរសម្នាក់ឈ្មោះ គេង វុធ បើកបរ Honda Dream 020 ពាក់ស្លាកលេខ ព្រះសីហនុ 1J-2019 បើកបរនៅតាមបណ្ដោយផ្លូវ CT ទិសដៅពីផ្សារពាណិជ្ជកម្មទៅរ៉ា ខណៈពេលដែលមកដល់កន្លែងកើតហេតុ បានវាយស៊ីញ៉ូបត់ឆ្វេងឆ្លងផ្លូវបានបន្តិច ស្រាប់តែរថយន្តកូរ៉េមួយគ្រឿងដឹកកញ្ចក់ ទើបពាក់ស្លាកលេខ 2A-1983 បើកបរដោយបុរសម្នាក់ឈ្មោះ ផល ផាន់នី មុខរបរ ជាងកាត់កញ្ចក់ បើកបរក្នុងទិសដៅស្របគ្នាជាមួយម៉ូតូ តែជាន់ហ្វ្រាំងមិនទាន់ ក៏បានបុកម៉ូតូចំពាក់កណ្ដាលមួយទំហឹង បណ្ដាលឲ្យម្ចាស់ម៉ូតូរងរបួសធ្ងន់ ត្រូវបានបញ្ជូនទៅមន្ទីរពេទ្យបង្អែកខេត្តព្រះសីហនុភ្លាមភ្លាមតែម្ដង។

ចំណែកម៉ូតូនិងរថយន្តត្រូវបានសមត្ថកិច្ចធ្វើការវាស់វែងយកទៅរក្សាទុកនៅប៉ុស្តិ៍ចរាចរណ៍ រង់ចាំដោះស្រាយគ្នាតាមច្បាប់បន្តទៀត៕