ភ្នំពេញ៖ ជនសង្ស័យចំនួន៦នាក់ ធ្វើសកម្មភាពឆក់ខ្សែកប្លាទីនទម្ងន់៧ជីបន្តោងដាំត្បូងពេជ្រ ពីយុវតីម្នាក់បានសម្រេច ហើយព្យាយាមរត់គេចខ្លួន ត្រូវបានជនរងគ្រោះស្រែកចោរៗ ផ្អើលដល់សមត្ថកិច្ចកំពុងល្បាតចាប់ឃាត់ខ្លួនបានភ្លាមៗ កាលពីវេលាម៉ោង២និង៣០នាទី រសៀលថ្ងៃទី១៩ ខែមីនា ឆ្នាំ២០២១ នៅមុខដីឡូត៍គ្មានលេខ ផ្លូវបេតុង ភូមិកោះក្របី សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ។

សមត្ថកិច្ចបានឲ្យដឹងថា ជនរងគ្រោះ ភេទស្រី អាយុ១៧ឆ្នាំ មុខរបរជាងអ៊ុតសក់ ស្នាក់នៅភូមិព្រែកថ្មី១ សង្កាត់ព្រែកថ្មី ខណ្ឌ ច្បារអំពៅ។ ចំណែកជនសង្ស័យឃាត់ខ្លួនបាន ០៦នាក់ ៖

១-ឈ្មោះកៅ វិចិត្ររាជ ភេទប្រុស អាយុ ១៧ឆ្នាំ ជាតិខ្មែរ មុខរបរសិស្ស ស្នាក់នៅភូមិ តាងៅ សង្កាត់និរោធ ខណ្ឌច្បារអំពៅ។

២-ឈ្មោះសុក ធា ភេទប្រុស អាយុ ១៧ឆ្នាំ ជាតិខ្មែរ មុខរបរ រត់ម៉ូតូកង់បី ស្នាក់នៅសង្កាត់បឹងត្របែក ខណ្ឌចំការមន។

៣-ឈ្មោះប៊ុន ណារិទ្ធ ភេទប្រុស អាយុ១៧ ឆ្នាំ ជាតិខ្មែរ មុខរបរសិស្ស ស្នាក់នៅផ្ទះជួល សង្កាត់បឹងត្របែក ខណ្ឌចំការមន។

៤-ឈ្មោះ អ៊ុ និមល ភេទប្រុស អាយុ ១៧ឆ្នាំ ជាតិខ្មែរ មុខរបរ គ្មាន ស្នាក់នៅផ្ទះគ្មានលេខ សង្កាត់ចាក់អង្រែលើ ខណ្ឌមានជ័យ។

៥-ឈ្មោះពេជ្រ សៀវនី ភេទប្រុស អាយុ១៦ ឆ្នាំ ជាតិខ្មែរ មុខរបរសិស្ស ស្នាក់នៅភូមិ៥ សង្កាត់បឹងត្របែក ខណ្ឌចំការមន។

៦-ឈ្មោះសុខ វិសិដ្ឋ ភេទប្រុស អាយុ១៧ឆ្នាំ ជាតិខ្មែរ មុខរបរ គ្មាន ស្នាក់នៅភូមិបឹងសា ឡាង សង្កាត់ឬស្សីកែវ ខណ្ឌឬស្សីកែវ។

របាយការណ៍សមត្ថកិច្ចបញ្ជាក់ថា មុនពេលកើតហេតុជនរងគ្រោះ និងមិត្តភក្តិជិះម៉ូតូឌុបគ្នាទៅផឹកកាហ្វេ ពេលមកដល់ចំណុចកើតហេតុ ស្រាប់តែមានជនសង្ស័យ ០៦នាក់ខាងលើ ជិះម៉ូតូ ០៣គ្រឿង ម៉ាកហុងដាសេ១២៥ ពណ៌ខ្មៅ ពាក់ផ្លាកលេខ ៖ ស្វាយរៀង 1Q-2353 , ភ្នំពេញ 1IN-4203, ភ្នំពេញ 1IQ-1069) ធ្វើសកម្មភាពឆក់ខ្សែកប្លាទីនទម្ងន់៧ជី មាន បន្តោងដាំត្បូងពេជ្រពីជនរងគ្រោះបានសម្រេច រួចគេចខ្លួន ពេលនោះជនរងគ្រោះដេញតាមពីក្រោយស្រែកចោរៗ ក៏មានសមត្ថកិច្ចល្បាតក្បែរនោះដេញតាមដល់ក្នុងដីឡូត៍ក្បែរនោះ ក៏ដួលម៉ូតូជ្រុះបាត់ខ្សែកជនរងគ្រោះ រួចសមត្ថកិច្ចក៏ឃាត់ខ្លួនជនសង្ស័យទាំង០៦នាក់ខាងលើ រួមនិងវត្ថុតាងម៉ូតូ៣គ្រឿង ជិះធ្វើសកម្មភាព បញ្ជូនមកអធិការដ្ឋាននគរបាលខណ្ឌច្បារអំពៅ ចាត់ការតាមច្បាប់ តែម្តង៕