ភ្នំពេញ៖ មានការភ្ញាក់ផ្អើលទាំងយប់មួយបានកើតឡើង ដោយជនសង្ស័យ២នាក់ បានធ្វើសកម្មភាពឆក់កាបូបនារីរូបស្រស់ស្អាតម្នាក់ ដែលកំពុងធ្វើដំណើរតាមដងផ្លូវមិនសម្រេច ត្រូវប្រជាពលរដ្ឋវាយស្ទើរក្ស័យ កាលពីវេលាម៉ោង៨ និង៣០នាទី ថ្ងៃទី២២ ខែមីនា ឆ្នាំ២០២១ នៅតាមបណ្ដោយផ្លូវសហព័ន្ធរុស្ស៊ី ក្នុងសង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ ។

តាមប្រភពព័ត៌មាន ពីនារីជនរងគ្រោះ បានឲ្យដឹងថា មុនពេលកើតហេតុ ខ្លួនបានជិះម៉ូតូម៉ាកZoomer-X មួយគ្រឿង ពាក់ស្លាកលេខ រតនគីរី 1E-7375 ជិះចេញពីញ៉ាំអីជាមួយនឹងមិត្តភក្កិ មកដល់ចំណុចមុខពេទ្យកុមារជាតិ ស្រាប់តែមានជនសង្ស័យ២នាក់ ជិះម៉ូតូម៉ាក Nex មួយគ្រឿង ស្លាកលេក ភ្នំពេញ 1IA -1696 មកធ្វើសកម្មភាពឆក់កាបូបមិនបានសម្រេច ត្រូវបានយុវជនម្នាក់ជិះម៉ូតូដេញតាម ស្រែកចោរៗ រហូតជិះរត់មកដល់ចំណុចក្រោយទីស្ដីការគណៈរដ្ឋមន្ត្រី ត្រូវបានបងប្អូនប្រជាពលរដ្ឋស្ទាក់ចាប់បាន វាយស្វាគមន៍ម្នាក់មួយដៃ មួយជើង ស្ទើរក្ស័យ ភ្លាមនោះសមត្ថកិច្ចមូលដ្ឋានក៏បានមកដល់ យកជនសង្ស័យទៅសួរនាំនៅនៅប៉ុស្តិ៍នគរបាលមិត្តភាព ដើម្បីសាកសួរ និងប្រគល់ជនសង្ស័យឲ្យទៅសមត្ថកិច្ចខណ្ឌទួលគោកវិញដែលជាម្ចាស់ករណី ដើម្បីចាត់ការតាមច្បាប់បន្តទៀត ៕