ភ្នំពេញ៖ ពិតជារន្ធត់ណាស់ ស្លាប់ទាំងព្រឹកទៀតហើយ ខណៈយុវជនម្នាក់ ដែលជាជនជាតិវៀតណាម ជិះម៉ូតូអូតូមួយគ្រឿងតាមដងផ្លូវ ត្រូវបានរថយន្តក្រឡុកស៊ីម៉ង់ត៍មួយគ្រឿង បើកមកបុកពីក្រោយបណ្តាលឲ្យដួលខ្ទាតទៅផ្លូវ ហើយត្រូវបានរថយន្តនោះកិនស្លាប់យ៉ាងរន្ធត់នៅក្នុងថ្លុកឈាម យ៉ាងអាណោចអាធ័ម កាលពីវេលាម៉ោង៩ និង៣០នាទីព្រឹក ថ្ងៃទី២៤ ខែមីនា ឆ្នាំ២០២១ នៅចំណុចផ្លូវលេខ៥៩៨ កែងក្រេនភ្នំពេញ ត្រង់ផ្លូវបំបែកជា៤ ក្នុងសង្កាត់ច្រាំងចំរេះទី១ ខណ្ឌឬស្សីកែវ រាជធានីភ្នំពេញ។

បើតាមប្រភពព័ត៌មានពីកន្លែងកើតហេតុ បានប្រាប់ TVFB ឲ្យដឹងថា ដំបូងឡើយគេឃើញជនរងគ្រោះ ដែលជាជនជាតិវៀតណាម បានជិះម៉ូតូអូតូមួយគ្រឿង ពណ៌ក្រហម ពាក់ស្លាកលេខ ភ្នំពេញ 1HW-8049 បើកបរពីលិចទៅកើត លុះដល់ចំណុចត្រង់ផ្លូវបំបែកជា៤ ក៏ត្រូវបានរថយន្ត ក្រឡុកស៊ីម៉ង់ត៍ ពាក់ស្លាកលេខ ភ្នំពេញ 5A-1750 របស់ក្រុមហ៊ុន Zhong Run Concrete មួយគ្រឿង មិនដឹងបើកយ៉ាងម៉េច មកបុកពីក្រោយម៉ូតូពេញទំហឹង បណ្តាលឲ្យដួលទៅលើដងផ្លូវ ហើយត្រូវបានរថយន្តកិនស្លាប់ភ្លាមៗយ៉ាងរន្ធត់នៅក្នុងថ្លុកឈាម តែម្តង ។

ភ្លាមៗសមត្ថកិច្ចបានចុះមកដល់កន្លែងកើតហេតុ ធ្វើការឃាត់ខ្លួនអ្នកបើករថយន្តបង្កខាងលើ និងធ្វើការវាស់វែង យករថយន្ត រួមទាំងម៉ូតូ និងអ្នកបើកបររថយន្ត យកទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នាតាមច្បាប់បន្តទៀត៕