មូស្គូ៖ ក្រសួងការពារជាតិរុស្ស៊ីបាននិយាយថា ទាហានជាង១ម៉ឺននាក់ បាននិងកំពុងវិលត្រឡប់ ទៅកាន់មូលដ្ឋានអចិន្ត្រៃយ៍របស់ពួកគេវិញ បន្ទាប់ពីសមយុទ្ធរយៈពេលមួយខែនៅជិតប្រទេសអ៊ុយក្រែន។ នេះបើយោងតាមការចេញផ្សាយដោយសារព័ត៌មាន bloomberg នៅថ្ងៃទី២៦ ខែធ្នូ ឆ្នាំ២០២១។

សមយុទ្ធនេះត្រូវបានធ្វើឡើងនៅក្នុងតំបន់ជាច្រើននៅជិតអ៊ុយក្រែន រួមទាំងនៅ តំបន់គ្រីមៀដែលរុស្ស៊ីបានបញ្ចូលជាដែនដីរបស់ខ្លួនក្នុងឆ្នាំ ២០១៤ ក៏ដូចជានៅក្នុងតំបន់ Rostov និង Kuban ភាគខាងត្បូងនៃប្រទេសរុស្ស៊ីផងដែរ។ នេះបើយោងតាម សេចក្តីថ្លែងការណ៍មួយដែលបាន បង្ហោះកាលពីថ្ងៃសៅរ៍នៅលើគេហទំព័ររបស់ក្រសួង។

ការដាក់ពង្រាយកងទ័ពរាប់ម៉ឺននាក់របស់រុស្ស៊ីទៅកាន់ភាគខាងជើង ខាងកើត និងខាងត្បូងនៃអ៊ុយក្រែន បានបង្កឱ្យមានការភ័យខ្លាចនៅក្នុងទីក្រុង កៀវ និងរដ្ឋធានីលោកខាងលិចថា ទីក្រុងម៉ូស្គូកំពុងរៀបចំផែនការវាយប្រហារ។

អ៊ុយក្រែន ប៉ាន់ប្រមាណថា ទាហានរុស្ស៊ី ១២២,០០០ នាក់ ស្ថិតនៅក្នុងចម្ងាយ២០០ គីឡូម៉ែត្រ (១២៤ ម៉ាយ) នៃព្រំដែនរួមរបស់ពួកគេ កើនឡើងពីប្រហែល ១០០,០០០ កាលពីប៉ុន្មានសប្តាហ៍មុន ខណៈដែលប្រទេសលោកខាងលិច និងមន្ត្រីនៅទីក្រុង កៀវ និយាយថា រុស្ស៊ីបន្តប្រមូលផ្តុំកម្លាំងមុនពេលការវាយប្រហារដ៏មានសក្តានុពល។

យ៉ាងណាមិញ រុស្ស៊ីបដិសេធចំពោះផែនការបែបនេះ ដោយអះអាងថា ខ្លួនត្រូវការការសន្យាពីលោកខាងលិច រួមទាំងការសន្យាពីអង្គការណាតូ ថានឹងមិនពង្រីកសម្ព័ន្ធភាពឆ្ពោះទៅខាងកើតឆ្ពោះទៅព្រំដែនរុស្ស៊ី ដោយសារសន្តិសុខផ្ទាល់ខ្លួន ត្រូវបានគំរាមកំហែង ដោយទំនាក់ទំនង ដែលកំពុងកើនឡើងរបស់អ៊ុយក្រែន ជាមួយសម្ព័ន្ធមិត្តលោកខាងលិច។

ប៉ុន្តែទីក្រុងម៉ូស្គូ ក៏និយាយដែរថា ខ្លួនអាចពង្រាយទ័ពលើទឹកដីខ្លួនតាមការយល់ឃើញរបស់ខ្លួន៕

ប្រភព៖ bloomberg