តូក្យូ៖ អ្នកនាំពាក្យរដ្ឋាភិបាលជប៉ុន បាននិយាយនៅថ្ងៃអង្គារទី ២៨ ខែធ្នូ-រដ្ឋមន្ត្រីការពារជាតិជប៉ុន លោក Nobuo Kishi បាននិយាយកាលពីថ្ងៃចន្ទថា លោកបានយល់ព្រមជាមួយសមភាគីចិនរបស់លោក Wei Fenghe ដើម្បីចាប់ផ្តើមប្រតិបត្តិការបណ្តាញទូរស័ព្ទបន្ទាន់យោធា រវាងប្រទេសទាំងពីរ ចំពេលមានភាពតានតឹងលើកោះដែលមានជម្លោះនៅសមុទ្រចិនខាងកើត។ នេះបើយោងតាមការចេញផ្សាយដោយសារព័ត៌មាន Reuters នៅថ្ងៃទី២៨ ខែធ្នូ ឆ្នាំ២០២១។

រដ្ឋមន្ត្រីការពារជាតិជប៉ុន លោក Kishi ក៏បាននិយាយនៅក្នុងសន្និសីទសារព័ត៌មានមួយ បន្ទាប់ពីធ្វើសន្និសីទវីដេអូ ជាមួយសមភាគីចិនលោក Wei ថា សន្តិភាព និងស្ថិរភាព នៅច្រកសមុទ្រតៃវ៉ាន់ មានសារៈសំខាន់ សម្រាប់សន្តិសុខរបស់ប្រទេសជប៉ុន ហើយទីក្រុងតូក្យូ នឹងតាមដានយ៉ាងដិតដល់នូវការវិវត្តនៅទីនោះ។

លោក Kishi បាននិយាយថា «យើងបានបញ្ជាក់ថា ការបង្កើតបណ្តាញទូរស័ព្ទបន្ទាន់ ដំបូងរវាងអាជ្ញាធរការពារជាតិជប៉ុន និងចិន គឺមានសារៈសំខាន់» ដោយលោកបានបន្ថែមថា លោកបានសម្តែងនូវ«ការព្រួយបារម្ភយ៉ាងខ្លាំង» ចំពោះសកម្មភាពរបស់នាវាឆ្មាំឆ្នេរសមុទ្រចិន នៅក្នុងដែនទឹកជុំវិញ ប្រជុំកោះ Senkaku ដែលគ្រប់គ្រងដោយជប៉ុន ដែលទីក្រុងប៉េកាំង ទាមទារនិងហៅ Diaoyu ។

ក្រសួងការពារជាតិចិន បានដកស្រង់សម្តីលោក Wei ដែលបានប្រាប់លោក Kishi ថា ប្រទេសចិននឹង «ការពារយ៉ាងរឹងមាំនូវអធិបតេយ្យភាពដែនដីរបស់ខ្លួន ក៏ដូចជាសិទ្ធិ និងផលប្រយោជន៍ដែនសមុទ្រ» ជុំវិញបញ្ហា ប្រជុំកោះ Senkaku ។ ប្រទេសចិន និងជប៉ុនគួរតែ «រួមគ្នាគ្រប់គ្រង និងគ្រប់គ្រងហានិភ័យ» ខណៈពេលដែលផ្តោតលើស្ថានភាពរួមនៃទំនាក់ទំនងទ្វេភាគី និងការខិតខំរក្សាស្ថិរភាពនៅសមុទ្រចិនខាងកើត។ នេះបើតាមលោក Wei ត្រូវបានដកស្រង់សម្តីដោយក្រសួងការពារជាតិចិន។

គួរបញ្ជាក់ថា ក្នុងអំឡុងពេលនៃកិច្ចពិភាក្សាលើកដំបូងរបស់ពួកគេចាប់តាំងពីខែធ្នូឆ្នាំមុន ដែលមានរយៈពេលប្រហែលពីរម៉ោង លោក Kishi បាននិយាយថា ខ្សែទូរស័ព្ទបន្ទាន់ នឹងបង្កើនប្រសិទ្ធភាពនៃយន្តការទំនាក់ទំនងដែលប្រទេសទាំងពីរបានចាប់ផ្តើមនៅក្នុងឆ្នាំ២០១៨ ដើម្បីជៀសវាងការប៉ះទង្គិចគ្នាដោយចៃដន្យនៅសមុទ្រ និងនៅលើអាកាស៕

ប្រភព៖ Reuters