ក្រុមអ្នកវិទ្យាសាស្រ្តផ្នែកស្រាវជ្រាវសត្វព្រៃនៃមន្ទីរបរិស្ថានខេត្ដមណ្ឌលគិរីបានគូសបញ្ជាក់ថា ពួកគេបានប្រទះឃើញ ត្មាតភ្លើងចំនួន០៧ក្បាល និង បានឃើញមាន់ព្រៃចំនួន០៥ក្បាល នៅដែនជម្រកសត្វព្រៃស្រែពក។ នេះបើតាមមន្រី្ដនៃមន្ទីរបរិស្ថានខេត្តមណ្ឌលគិរី បានឲ្យដឹងនៅថ្ងៃទី៣១ ខែធ្នូ ឆ្នាំ២០២១នេះ ដោយបានលើកឡើងថា នេះជាក្តីរំភើបរីក រាយឥតឧបមាដែលក្រុមអ្នកវិទ្យាសាស្រ្តផ្នែកស្រាវជ្រាវសត្វព្រៃនៃមន្ទីរបរិស្ថានខេត្ដមណ្ឌលគិរីដោយមានការគាំទ្រពីអង្គការ WWF បានផ្តល់របាយការណ៍កាលពីថ្ងៃទី២៧ ខែធ្នូ ឆ្នាំ២០២១។
គួរបញ្ជាក់ផងដែរថា នេះជាលើកទីមួយហើយដែលចំនួនត្មាតភ្លើងមានចំនួនកើនឡើងក្រោយពីបាត់វត្តមានអស់រយៈពេលពីរឆ្នាំ ដែលពីមុនមកយើងបានឃើញ ០៥ក្បាល ឬ ០៦ក្បាលប៉ុណ្ណោះ។
ត្មាតភ្លើង (Red headed vulture) វាមានរោមដងខ្លួនពណ៌ក្រមៅ និងក្បាលស្មើតែគ្មានរោម (គឺមានតិចបំផុត) ដោយបញ្ចេញស្បែកក្បាល និងកពណ៌ក្រហមដូចភ្លើង រួមទាំងបន្ទះស្បែកអមថ្ពាល់ដូចស្លឹកត្រចៀកទាំងសងខាងផងក៏ពណ៌ក្រហមដែរ។ វាទម្ងន់ចន្លោះពី ៣,៥០ គីឡូក្រាមដល់ ៦,៣០គីឡូក្រាម វាមានបណ្តោយដងខ្លួនប្រមាណ ០,៧៦ ម៉ែត្រ ដល់ ០,៨៦ ម៉ែត្រ និងមានប្រវែងពីចុងស្លាបម្ខាងទៅដល់ចុងស្លាបម្ខាងទៀត ២ម៉ែត្រ ដល់២,៦០ម៉ែត្រ នៅពេលវាលាតសន្ធឹងស្លាបហើរ។ ត្មាតភ្លើងជាបក្សីមានមាឌទាបកន្តាញ ដោយមានកម្ពស់របស់វាប្រមាណជា០,៦០ម៉ែត្រ ទៅ០,៧០ម៉ែត្រ ប៉ុណ្ណោះ។ ត្មាតភ្លើងជាប្រភេទត្មាត ដែលអ្នកស្រុកជនជាតិអាស៊ី មួយចំនួនធំបានចាត់ទុកជាមេត្មាត ឬមេហ្វូង ឬហៅថាស្តេចត្មាត ។
បើតាមក្រុមអ្នកស្រាវជ្រាវដែលបានធ្វើការអង្កេតតាមដានសកម្មភាពរបស់សត្វត្មាតភ្លើងនៅក្នុងធម្មជាតិបានឲ្យដឹងថា ត្មាតភ្លើង ពេលវាដើរផ្ទាល់ដី វាមានដំណើររាងបើកដើមស្លាបជានិច្ច ឬហៅថាដំណើររបៀបកាងស្លាប ឬថាដើរពើងទ្រូង ឥរិយាបថរបស់វាបង្ហាញពីភាពមិនខ្លាចគេ ជាមេគេ ហើយត្មាតប្រភេទផ្សេងៗទៀតក៏ពុំសូវហ៊ានប្រឈមតទល់នឹងវាដែរ។ រីឯពេលវាស៊ីចំណីអាហារទៀតសោត ក៏វាពុំដែលចុះមកដណ្តើមគេស៊ីពីគ្រាដំបូងដែរ វាច្រើនតែទុកពេលឱ្យត្មាតផ្សេងៗទៀតស៊ីមួយសន្ទុះសិន ទើបវាចុះមកស៊ីតាមក្រោយ នេះ ទំនងជាវាគិតពីសុវត្ថិភាពនៅទីនោះ រួមទាំងការពុលចំណីអាហារផងក៏អាចថាបាន ពេលដែលវាចុះមកស៊ីចំណីហើយ ភាគច្រើនត្មាតឯទៀតក៏តែងទុកចន្លោះកន្លែងឱ្យវាចូលស៊ីជានិច្ច៕ ប្រភព៖ AKP
