អន្តរជាតិ៖ សារព័ត៌មាន The Irrawaddy បានចេញផ្សាយកាលថ្ងៃទី១៩ ខែមេសា ឆ្នាំ២០២១ បានឲ្យដឹងថា ប្រភពពីរដ្ឋាភិបាលបាននិយាយកាលពីថ្ងៃច័ន្ទថា នាយករដ្ឋមន្រ្តី លោក ប្រាយុធ ចានអូចា បានសម្រេចចិត្តដកខ្លួន ចេញពីកិច្ចប្រជុំកំពូលអាស៊ានមួយនៅទីក្រុងហ្សាការតា ហើយបញ្ជូនរដ្ឋមន្រ្តីការបរទេសទៅធ្វើជាតំណាងប្រទេសថៃនៅក្នុងកិច្ចប្រជុំនេះ។

ប្រភពមិនបានបញ្ជាក់លម្អិតអំពីការសម្រេចចិត្តរបស់លោកនាយករដ្ឋមន្រ្តី ដើម្បីស្នាក់នៅផ្ទះដោយបញ្ជូនរដ្ឋមន្រ្តីក្រសួងការបរទេស Don Pramudwinai ដែលជាឧបនាយករដ្ឋមន្ត្រីផងដែរ ដើម្បីចូលរួមជាមួយមេដឹកនាំអាស៊ីអាគ្នេយ៍ដទៃទៀត ស្តីពីស្ថានភាពនៅមីយ៉ាន់ម៉ា។

កិច្ចប្រជុំកំពូលពិសេសរបស់សមាគមប្រជាជាតិអាស៊ីអាគ្នេយ៍ នឹងត្រូវកោះប្រជុំនៅរដ្ឋធានីឥណ្ឌូណេស៊ី នៅថ្ងៃសៅរ៍សប្តាហ៍នេះ ដើម្បីស្វែងរកដំណោះស្រាយចំពោះវិបត្តិដែលកាន់តែយ៉ាប់យ៉ឺននៅក្នុងប្រទេសមីយ៉ាន់ម៉ា។

ក្រសួងការបរទេសថៃបាននិយាយ ថា នាយឧត្តមសេនីយយោធា Min Min Hlaing នឹងចូលរួមនៅក្នុងកិច្ចចរចាថ្នាក់ខ្ពស់។

រដ្ឋាភិបាលស្រមោលរបស់មីយ៉ាន់ម៉ាក៏បានជំរុញឱ្យមេដឹកនាំអាស៊ានផ្តល់ឱ្យវានូវឱកាសមួយដើម្បីចូលរួមក្នុងកិច្ចប្រជុំកំពូលដែលរំពឹងទុក។

គួរបញ្ជាក់ថា មនុស្សជាង ៧០០នាក់ត្រូវបានសម្លាប់ នៅក្នុងការតវ៉ាទូទាំងប្រទេស ប្រឆាំងនឹងរបបយោធា បន្ទាប់ពីរដ្ឋប្រហារនៅថ្ងៃទី ១ ខែកុម្ភៈ ដែលបានផ្តួលរំលំមេដឹកនាំជាប់ឆ្នោតលោកស្រី អ៊ុង សានស៊ូជី និងបានចោទប្រកាន់លោកស្រី ជាច្រើនករណី៕

ប្រភព៖ The Irrawaddy ប្រែសម្រួល៖ ណារិន