សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានស្នើដល់បណ្តាអភិបាលខេត្តយកចិត្តទុកដាក់ជួយសង្គ្រោះពលរដ្ឋដែលរងគ្រោះដោយសារទឹកជំនន់ ខណៈប៉ុន្មានថ្ងៃជាប់ៗគ្នាកន្លងទៅនេះ នៅទូទាំងប្រទេសកម្ពុជាមានភ្លៀងធ្លាក់ជារៀងរាល់ថ្ងៃ ដែលអាចឈានដល់មានគ្រោះទឹកជំនន់នៅតាមតំបន់មួយចំនួន។
ការស្នើឡើងនេះ បន្ទាប់ពីសម្ដេចធិបតី បានតាមដាននិងមើលឃើញករណីទឹកជំនន់បានចាប់ផ្ដើមកើតឡើងជាបណ្ដើរៗហើយនៅតាមខេត្តក្រុងខ្លះដែលនៅជាប់តំបន់មានស្ទឺង បឹងទន្លេជាដើម។
តាមរយៈសារជាសំឡេងក្នុងតេឡេក្រាមនៅថ្ងៃទី២៩កញ្ញានេះ សម្ដេចធិបតី បានថ្លែងថា«ខ្ញុំសុំឱ្យឯកឧត្តម ទេសរដ្ឋមន្ត្រី គន់ គីម អនុប្រធានទី១គណៈកម្មការជាតិគ្រប់គ្រងគ្រោះមហន្តរាយបន្តតាមដានឱ្យជាប់ និងសហការជាមួយគណៈអភិបាលរាជធានីខេត្តនៅក្នុងការត្រៀមមធ្យោយបាយ អន្តរាគមន៍សង្រ្គោះបន្ថែម នៅក្នុងករណីដែលរាជធានីខេត្តត្រូវការ ខ្ញុំសូម ឯកឧត្តម អគ្គមេបញ្ជាការ មេបញ្ជាការកងរាជអាវុធហត្ថលើផ្ទៃប្រទេស មេបញ្ជាការកងទ័ពជើងគោក ជើងទឹក ជើងអាកាសសូមត្រៀមលក្ខណៈត្រៀមមធ្យោបាយ ត្រៀមកម្លាំង និងសម្ភារចាំបាច់នៅក្នុងការត្រៀមអន្តរាគមន៍សង្រ្គោះទៅដល់ប្រជាពលរដ្ឋនៅក្នុងតំបន់ដែលអាចរងការប៉ះពាល់ដោយទឹកជំនន់នេះ»។
ជាមួយគ្នានេះដែរ សម្ដេចធិបតី បានស្នើឱ្យ អគ្គបណ្ឌិតសភាចារ្យ អូន ព័ន្ធមុនីរ័ត្ន ក៏ដូចជាស្ថាប័នពាក់ព័ន្ធសូមត្រៀមនូវស្បៀង នូវសម្ភារបរិក្ខារចាំបាច់សម្រាប់បញ្ចេញទៅឱ្យពលរដ្ឋដែលត្រូវរងគ្រោះដោយទឹកជំនន់ ក្នុងករណីមានការស្នើសុំពីរាជធានីខេត្តដើម្បីផ្ដល់ជូនប្រជាពលរដ្ឋដែលរងគ្រោះ។
ទន្ទឹមនេះ សម្តេចធិបតី បានស្នើឱ្យក្រសួងកសិកម្មនិងស្ថាប័នពាក់ព័ន្ធត្រៀមនូវស្រូវពូជនិងសម្ភារផ្សេងៗ ក្នុងករណីមានផលប៉ះពាល់ធំហើយអាចឈានទៅដល់ការស្ដារឡើងវិញជូនប្រជាពលរដ្ឋ៕ ទីភ្នាក់ងារសារព័ត៌មានកម្ពុជា- AKP
