រាជធានីភ្នំពេញ ៖ បុរសម្នាក់ បើករថយន្ដស៊េរីទំនើប Ford Raptor បើកបុកជាមួយកង់បីឥណ្ឌា ដែលបើកបត់ឆ្លងផ្លូវ បន្តទៅបុករបាំងថ្មដាក់បាំងការដ្ឋាន ហើយជ្រុលទៅបុករបងការដ្ឋានសាងសង់ស្ពានអាកាសបន្ថែមទៀត បណ្តាលឲ្យរងការខូចខាត កាលពីវេលាម៉ោង១២ យប់ ឈានចូលថ្ងៃទី២៧ ខែតុលា ឆ្នាំ២០២៣ នៅចំណុចតាមបណ្ដោយផ្លូវ៦០ម៉ែត្រ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ។
ប្រភពព័ត៌មានពីបងប្អូនប្រជាពលរដ្ឋ និងសមត្ថកិច្ចបានឲ្យដឹងថា មុនពេលកើតហេតុ គេបានឃើញបុរសម្នាក់បើករថយន្ដស៊េរីទំនើប Ford Raptor មួយគ្រឿង ដែលពាក់ស្លាកលេខ ភ្នំពេញ 2BU-1698 បើកតាមបណ្ដោយផ្លូវ៦០ម៉ែត្រ ក្នុងទិសដៅពីត្បូងទៅជើង មកដល់កន្លែងកើតហេតុ ក៏បើកបុកជាមួយកង់បីឥណ្ឌាដែលបើកបត់ឆ្លងផ្លូវយឿតៗ ហើយរថយន្ដមិនទាន់អស់ល្បឿន បន្តទៅបុករបាំងថ្មដាក់បាំងការដ្ឋានស្ពានអាកាស៦០ម៉ែត្រ បន្ដទៅបុករបងការដ្ឋានសាងសង់ស្ពានអាកាសបណ្ដាលឲ្យរងការខូចខាតយ៉ាងដំណំថែមទៀត។
ក្រោយកើតហេតុ សមត្ថកិច្ចជំនាញចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ចុះមកធ្វើការវាស់វែងយករថយន្ដនិងកង់បីឥណ្ឌា ទៅរក្សាទុករងការដោះស្រាយនៅពេលក្រោយ ៕ Mrr Ka
.jpg?1698383859)
