រាជធានីភ្នំពេញ ៖ ជនសង្ស័យម្នាក់បានជិះម៉ូតូមួយគ្រឿងធ្វើសកម្មភាពឆក់ការបូបស្ពាយពីបុរសជនជាតិបរទេសម្នាក់កំពុងដើរតាមដងផ្លូវ មិនបានសម្រេចរួចជិះបញ្ច្រាសផ្លូវទៅបុកម៉ូតូមួយគ្រឿងទៀតដួលទៅនឹងថ្នល់ ត្រូវបានសមត្ថកិច្ចក្របួចជាប់ កាលពីវេលាម៉ោង ១២ និង ៤០ នាទីយប់រំលងអាធ្រាត្រឈានចូលថ្ងៃទី ២៧ ខែតុលាឆ្នាំ ២០២៣ នៅត្រង់ចំណុចមុខសាលាភូមិន្ទ តាមបណ្តោយផ្លូវសហព័ន្ធរុស្សី ស្ថិតក្នុងសង្កាត់ទឹកល្អកទី១ ខណ្ឌទួលគោករាជធានីភ្នំពេញ។

ជនសង្ស័យក្រោយសមត្ថកិច្ចឃាត់ខ្លួន គេឃើញមានកាតសម្គាល់ខ្លួនជាអ្នកសារព័ត៌មានម្នាក់ មានឈ្មោះ ផាន វារ: ភេទប្រុស អាយុ២៣ឆ្នាំ នៅអង្គភាពស្ទឹងមានជ័យ ។

តាមប្រភពព័ត៌មានពីកន្លែងកើតហេតុបានឲ្យដឹងថាមុនកើតហេតុគេឃើញជនសង្ស័យជិះម៉ូតូមួយគ្រឿងម៉ាកហុងដាឌ្រីម C125 ស៊េរីឆ្នាំ 2023 ពណ៌ខ្មៅពាក់ស្លាកលេខភ្នំពេញ1KG-9091 ធ្វើដំណើរទៅដៅពីកើតទៅលិច លុះមកដល់កន្លែងកើតហេតុ បានធ្វើសកម្មភាពឆក់កាបូបស្ពាយពីជនជាតិបរទេសម្នាក់ កំពុងដើរតាមដងផ្លូវ មិនបានសម្រេចរួចក៏ជិះរត់បញ្ច្រាស់ផ្លូវទៅបុកម៉ូតូPCX មួយគ្រឿង ពាក់ស្លាកលេខ ភ្នំពេញ1HI-6222 ជិះដោយបុរសម្នាក់បញ្ច្រាសទិសដៅគ្នាពីលិចទៅកើតចំពីមុខពេញទំហឹង បណ្ដាលឲ្យម៉ូតូទាំងពីរគ្រឿងដួលទៅនឹងថ្នល់ ភ្លាមនោះបង្កឲ្យមានការភ្ញាក់ផ្អើល ស្របពេលពេលកម្លាំងសមត្ថកិច្ចកំពុងល្បាតនៅក្បែរនោះក៏បានធ្វើការគាត់ខ្លួនជនសង្ស័យបានភ្លាមៗ រួចបញ្ជូនមកប៉ុស្តិ៍នគរបាលធ្វើការសួរនាំបន្ត។

បច្ចុប្បន្នជនសង្ស័យត្រូវបានកម្លាំងសមត្ថកិច្ចបញ្ជូនខ្លួនទៅអធិការដ្ឋាននគរបាលខណ្ឌទួលគោកដើម្បីចាត់ការបន្ត ចំណែងជនរងគ្រោះសមត្ថកិច្ចបាននាំមកដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលទឹកល្អក់ទី១ដើម្បីឲ្យសមត្ថកាកិច្ចចាត់ការតាមផ្លូវច្បាប់៕ មេសា