ខេត្តកំពង់ស្ពឺ ៖ ឃ្លាំងលក់រថយន្ដមួយកន្លែង ត្រូវបានអគ្គិភ័យឆាបឆេះ បណ្ដាលអោយឆេះរថយន្ដអស់ជាច្រើនគ្រឿង នៅចំណុចអូរវែង​ ឃុំកាហែង​ ស្រុកសំរោងទង​ វេលាម៉ោង ១២និង ៤៥នាទីយប់ឈានថ្ងៃទី​១​ វិច្ឆិកា​ ឆ្នាំ២០២៣។ នេះបើយោងតាមផេក ស្នងការដ្ឋាននគរបាលខេត្តកំពង់ស្ពឺ ។

សមត្ថកិច្ចបានឲ្យដឹងថា ករណីអគ្គិភ័យនេះ បានឆេះការ៉ាស់ជួសជុល និងលក់រថយន្ដ ទំហំ២០ គុណ៣៤ម៉ែត្រ ជញ្ជាំងស័ង្កសី ដំបូលស័ង្កសី ម្ចាស់ឈ្មោះ មុយ ចាន់ណារី ភេទប្រុស អា​យុ៤១ឆ្នាំ ប្រពន្ធឈ្មោះ ឪ ស្រីនោ អាយុ៣៩ឆ្នាំ រស់នៅភូមិកើតហេតុ​ ជាម្ចាស់​ឃ្លាំងនិងម្ចាស់ទីតាំង។

តាមការបញ្ជាក់​ពីសមត្ថកិច្ច​ ករណី​អគ្គិភ័យ​បានបំផ្លាញឃ្លាំងទំហំ២០ម៉ែត្រ ×៣៤ ម៉ែត្រ ធ្វើអំពីដែកជញ្ជាំងស័ង្កសី ដំបូលស័ង្កសី​ ឆេះរថយន្ដLexus 470 ចំនួន ០១គ្រឿង , ឆេះរថយន្ដ Ford Ranger pickup ចំនួន ០២គ្រឿង, ឆេះរថយន្ដLand Cruiser ចំនួន ០២គ្រឿង, ឆេះរថយន្ដដឹកទំនិញ ចំនួន ០១គ្រឿង (ឆេះមួយផ្នែកខាងស្ដាំ) និងឆេះសម្ភារៈប្រើប្រាស់ក្នុងរថយន្ដមួយចំនួនទៀត។

សូមបញ្ជាក់ថា ក្នុងហេតុការណ៍​ខាងលើមិនបណ្តាល​ឱ្យ​មានរបួសមនុស្ស​ ឬគ្រោះថ្នាក់​ដល់អាយុជីវិតឡើយ​។ សមត្ថកិច្ច​អាជ្ញាធរ​មូលដ្ឋាន​បាន​ម្ចាស់​ការ និងជួយអន្ដរាគមន៍គ្រប់គ្រងមិនអោយអគ្គិភ័យឆេះរាលដាលដល់ផ្ទះប្រជាពលរដ្ឋឬលំនៅឋាននៅក្បែរទីតាំងឆេះ​ ដោយប្រើប្រាស់រថយន្ដសង្រ្គោះអគ្គិភ័យ​ចំនួន០៦គ្រឿង​ និងប្រើទឹកអស់០៧រថយន្ត​។

តាមអ្វីដែលទទួលបានបឋមពីកន្លែងកើតហេតុគឺមូលហេតុ បណ្តាលមកពីឆ្លងចរន្ដអគ្គិសនីក្នុងរថយន្ដ ព្រោះរថយន្ដដែលដាក់តាំងលក់នោះជាប្រភេទរថយន្ដជួសជុលផង​ រថយន្ដលក់ផង​ (មួយទឹក)​ ៕