រាជធានីភ្នំពេញ ៖ ករណីគ្រោះថ្នាក់ចរាចរណ៍មួយបានកើតឡើង រវាងរថយន្តដឹកប្រេងមួយគ្រឿង បើកកៀរម៉ូតូស្កុបពី ដួលកិនជនរងគ្រោះរបួសស្ត្រីម្នាក់ ធ្ងន់ធ្ងរ ត្រូវបាន កងសង្គ្រោះបន្ទាន់៧១១កងពលតូចលេខ៧០ បានចេញជួយសង្គ្រោះ បញ្ជូនទៅកាន់មន្ទីរពេទ្យ ។
ហេតុការណ៍នេះបានកើតឡើងនៅវេលាម៉ោង ៤និង០៥នាទីរសៀល ថ្ងៃទី០១ ខែវិច្ឆិកា ឆ្នាំ២០២៣ នៅចំណុចភ្លើងស្តុប ផ្លូវ៦០ម៉ែត្រ កែងផ្លូវវត្តជន្លង់ម្លូ ភូមិកប់ភ្លុក សង្កាត់ភ្លើងឆេះទេះ ខណ្ឌកំបូល ។
សមត្ថកិច្ចបានឲ្យដឹងថា ជនរងគ្រោះឈ្មោះ ណារី ភេទស្រី អាយុ៣៨ឆ្នាំ មានទីលំនៅភូមិភ្លើងឆេះរទេះ សង្កាត់ភ្លើងឆេះរទេះ ខណ្ឌកំបូល រងរបួសផ្នែកត្រគៀកធ្ងន់ធ្ងរ ត្រូវបានរថយន្តសង្គ្រោះរបស់អង្គភាព៧១១ កងពលតូចលេខ៧០ ដឹកបញ្ជូនទៅព្យាបាលនៅមន្ទីរពេទ្យព្រះកុសុមៈ ហើយតាមការបញ្ជាក់ពីកងសង្គ្រោះបន្ទាន់៧១១កងពលតូចលេខ៧០ ជនរងគ្រោះក្រោយបញ្ជូនដល់មន្ទីរពេទ្យពេលនេះបានស្លាប់ហើយ ។
ចំណែកវត្ថុតាងប្រគល់ឲ្យសមត្ថកិច្ចជំនាញធ្វើការវាស់វែង យកទៅរក្សាទុក រង់ចាំដោះស្រាយគ្នាពេលក្រោយតាមច្បាប់បន្តទៀត ៕ មេសា
