ខេត្តបាត់ដំបង ៖ នៅថ្ងៃទី០២ខែវិច្ឆិកាឆ្នាំ២០២៣ អនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបងនិងលោកឧត្តមសេនីយ៍ត្រី លឹម ពុទ្ធីឡា ស្នងការរងផែនការងារនគរបាលព្រហ្មទ័ណ្ឌ លោកវរសេនីយ៍ទោ វេ គឹមចត់ អធិការនគរបាលស្រុកកំរៀងបានដឹកនាំ កម្លាំងផ្នែកជំនាញរួមជាមួយកម្លាំងប៉ុស្តិ៍នគរបាលរដ្ឋបាលកំរៀងធ្វើការស្រាវជ្រាវនិងឃាត់ខ្លួនក្មេងទំនើងចំនួនពីរនាក់និងម៉ូតូមួយគ្រឿង ក្នុងនោះមានឈ្មោះ វ៉ាន់ ណេតភេទប្រុស រស់នៅភូមិកំរៀងឃុំកំរៀងស្រុកកំរៀងខេត្តបាត់ដំបង មានមុខរបរ សិស្សនិងឈ្មោះ ខេង ឡៃ ភេទប្រុ ស រស់នៅភូមិកំរៀង ឃុំកំរៀងស្រុកកំរៀងខេត្តបាត់ ដំបង មានមុខរបរ កសិករ។នេះបើយោងតាមផេក ស្នងការដ្ឋាននគរបាលខេត្តបាត់ដំបង ។
សមត្ថកិច្ចបានឲ្យដឹងថា ចំពោះមូលហេតុដែលឈានដល់ការឃាត់ខ្លួននេះគឺ កាលពីថ្ងៃទី០១ ខែវិច្ឆិកា ឆ្នាំ២០២៣ វេលាម៉ោង៣ រសៀល ពួកគេទាំងពីរនាក់បានធ្វើសកម្មភាពបង្ហោះម៉ូតូនៅតាមដងផ្លូវ ស្ថិតនៅផ្លូវលេខ៥៩ និងនៅក្នុងសៃឡូក្នុងភូមិកំរៀង ឃុំកំរៀង ស្រុកកំរៀង ខេត្តបាត់ដំបង ដោយគេបានថតវីដេអូពីសកម្មភាពបង្ហោះម៉ូតូ យកទៅផុសតាមបណ្ដាញសង្គមហ្វេសប៊ុក បង្កឱ្យមានការរិះគន់ពីមហាជន។
ឃើញសកម្មភាពតាមបណ្តាញសង្គមបែបនេះ ទើបសមត្ថកិច្ចធ្វើការស្រាវជ្រាវ និងនាំខ្លួនមកធ្វើការសាកសួរ ហើយគេបានឆ្លើយទទួលស្គាល់ថាបានធ្វើសកម្មភាពបែបនេះប្រាកដមែន។
ករណីនេះនគរបាលស្រុកបានធ្វើការអប់រំដោយធ្វើកិច្ចសន្យាបញ្ឈប់ធ្វើសកម្មភាពបង្ហោះម៉ូតូទៀត ដោយមានអាណាព្យាបាលដឹងឮ ព្រមទាំងធានាយកទៅលំនៅដ្ឋានវិញដើម្បីអប់រំបន្ត៕
