រាជធានីភ្នំពេញ ៖ មានការភ្ញាក់ផ្អើលទាំងកណ្តាលរាត្រី ខណៈកម្លាំងមន្ទីរប្រឆាំងបទល្មើសគ្រឿងញៀន ក១០.២ និង ក១០.៥ បានធ្វើការចុះឡោមព័ទ្ធទីតាំងក្លឹបមួយកន្លែង យីហោ «Number 9» ដោយបានឃាត់ខ្លួនមនុស្សជាច្រើននាក់ ឡើងលើរថយន្ត បញ្ជូនទៅកាន់ អគ្គស្នងការដ្ឋាននគរបាលជាតិ ។
ប្រតិបត្តិការខាងលើនេះបានធ្វើឡើងនៅវេលាម៉ោង ១២យប់ ឈានចូលថ្ងៃទី៤ ខែវិច្ឆិកា ឆ្នាំ២០២៣ នៅចំណុចផ្លូវ ៣០៨ ស្ថិតនៅក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
តាមប្រភពពីសមត្ថកិច្ចបានឲ្យដឹងជាបឋមថា ការបង្ក្រាបនេះ គឺដោយស៊ើបអង្កេតឃើញនៅទីតាំងក្នុងក្លឹបកម្សាន «Number 9» ខាងលើ មានបង្កប់ប្រភេទថ្នាំជក់ ហៅបាឡូន និងបំពង់បឺតជាច្រើនទៀត ដែលគេនាំគ្នាជក់ហើយរាំលេងក្នុងក្លឹបនោះ ទើបកម្លាំងមន្ទីរប្រឆាំងបទល្មើសគ្រឿងញៀន ក១០.២ និង ក១០.៥ ចុះឆ្មក់បង្ក្រាបតែម្តង ដោយឃាត់ខ្លួនបានមនុស្សជាច្រើននាក់ បញ្ជូនតាមរថយន្ត យកទៅកាន់ អគ្គស្នងការដ្ឋាននគរបាលជាតិ ដើម្បីសាកសួរ និងចាត់ការបន្ត ស្របពេលក្លឹបមួយនេះ ក៏ត្រូវបានសមត្ថកិច្ចបិទ ឃ្លុំបេបណ្តោះអាសន្នផងដែរ ៕
