រាជធានីភ្នំពេញ ៖ យុវជន២នាក់ ជិះម៉ូតូ HONDA Dream ឌុបគ្នាបត់ឆ្វេងមិនប្រយ័ត្ន ត្រូវរថយន្ដកុងតឺន័រ បើកបុកពេញទំហឹង រួចកិនម៉ូតូអូសជាច្រើនម៉ែត្រ បណ្ដាលអោយរងរបួសទាំង២នាក់ ។
ហេតុការណ៍នេះបានកើតឡើងកាលពីវេលាម៉ោង ១២យប់ ថ្ងៃទី០៥ ខែវិច្ឆិកា ឆ្នាំ២០២៣ នៅចំណុចតាមបណ្ដោយផ្លូវ៥៩៨ កែងផ្លូវសហព័ន្ធរុស្ស៊ី សង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ ។
តាមប្រភពព័ត៌មានពីបងប្អូនប្រជាពលរដ្ឋ បានឲ្យដឹងថា មុនពេលកើតហេតុ គេបានឃើញយុវជន២នាក់ជិះម៉ូតូ HONDA Dream ពាក់ស្លាកលេខ ភ្នំពេញ 1CO-1915 ជិះឌុបគ្នាតាមបណ្ដោយផ្លូវ៥៩៨ មកដល់ចំណុចក្រោយស្ពានអាកាស៧មករា ក៏បានបត់ឆ្វេងមិនប្រុងប្រយ័ត្ន ត្រូវរថយន្ដ កុងតឺន័រ ពាក់ស្លាកលេខ ភ្នំពេញ 3F-5325 បើកបុកពេញទំហឹង រួចកិនម៉ូតូអូសជាច្រើនម៉ែត្រ បណ្ដាលឲ្យរងរបួសធ្ងន់។
ក្រោយកើតហេតុ សមត្ថកិច្ចជំនាញចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ចុះមកធ្វើការវាស់វែងយករថយន្ដ និងម៉ូតូទៅរក្សាទុក រង់ចាំការដោះស្រាយនៅពេលក្រោយ តាមច្បាប់បន្តទៀត ៕ Mrr Ka
