ខេត្តកំពង់ស្ពឺ ៖ រន្ធត់ណាស់ មនុស្ស២១ នាក់របួសធ្ងន់ និង ១៣នាក់ទៀតរបួសស្រាល ត្រូវបានបញ្ជូនទៅកាន់មន្ទីរពេទ្យ ក្នុងករណីគ្រោះថ្នាក់ចរាចរណ៍រវាង រថយន្តដឹកកម្មករបេះស្វាយ ជាមួយរថយន្ដ​Prius មួយគ្រឿង​ទៀត បណ្តាលឲ្យរថយន្តដឹកកម្មករបេះស្វាយ នោះ ក្រឡាប់អូសទៅលើផ្លូវ ។

ហេតុការណ៍នេះបានកើតឡើង នៅវេលាម៉ោង ៦ព្រឹកថ្ងៃទី៦ ខែវិច្ឆិកា ឆ្នាំ២០២៣ នៅចំណុចលើផ្លូវក្រាលកៅស៊ូ ត្រង់ចំណុចភូមិក្បាលទឹកលើ ឃុំជាំសង្កែ ស្រុកភ្នំស្រួច ខេត្តកំពង់ស្ពឺ ។ នេះបើយោងតាមផេក ស្នងការដ្ឋាននគរបាលខេត្តកំពង់ស្ពឺ ។

សមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍នេះ បង្កឡើងដោយរថយន្តដឹកកម្មករបេះស្វាយ ដែលបើ​កបរបញ្ច្រាសទិសគ្នា ជាមួយរថយន្ដ​​ Prius មួយគ្រឿង​ទៀត​ បណ្តាលឲ្យរបួសធ្ងន់២១ នាក់ ស្រី០៧នាក់ និងរបួសស្រាល ១៣ នាក់​ សរុបទាំងអស់​ ៣៣នាក់ ខណៈមូលហេតុ​ ជំនាញ​កំពុង​ពិនិត្យ​ស្រាវជ្រាវ ។

​

បន្ទាប់ពីកើតហេតុ សមត្ថកិច្ចក៏បានចុះទៅជួយសម្របសម្រួល​សង្រ្គោះ​បញ្ជូន​ទៅ​មន្ទីរ​ព្យាបាល​និងសង្រ្គោះ​ ម​ណ្ឌល​សុខភាព​ ដែលនៅគៀកជិត​ និងពិនិត្យ​ស្ថានភាព​ ប​ញ្ជូន​បន្ដក្នុងករណីធ្ងន់ធ្ងរ​ មន្ទីរពេទ្យ​បង្អែក​ត្រពាំង​ក្រឡឹង​ ។

ចំណែករថយន្តទាំង០២គ្រឿងរងការខូចខាតយ៉ាងដំណំ​ សមត្ថកិច្ចកំពុងចាត់ការតាមនីតិវិធី​ រីឯ​អ្នកបើកបរ​នៅនឹងកន្លែង​ កើតហេតុ​៕