រាជធានីភ្នំពេញ​៖ ជនសង្ស័យម្នាក់ ធ្វើសកម្មភាព​ យកសំប៉ែតចុងស្រួចកាច់សោរកលួចម៉ូតូរបស់ប្រជាពលរដ្ឋ ត្រូវបានកម្លាំងផ្នែកព្រហ្មទណ្ឌ រួមជាមួយកម្លាំងនគរបាលប៉ុស្តិ៍ទួលសង្កែទី២​ ធ្វើការឃាត់ខ្លួនបាន ។

ហេតុការណ៍នេះបានកើតឡើងកាលពីវេលាម៉ោង ៤ល្ងាច ថ្ងៃទី៧ ខែវិច្ឆិកា ឆ្នាំ២០២៣ នៅចំណុចផ្ទះលេខ៣០K ផ្លូវ១០៣ ភូមិទួលថ្ងាន់ សង្កាត់ទួលសង្កែទី២​ ខណ្ឌឬស្សីកែវ​ រាជធានីភ្នំពេញ។

សមត្ថកិច្ចបានឲ្យដឹងថា ជនសង្ស័យខាងលើនេះ មានឈ្មោះ​ ហៀង រ៉ាស៊ីម ភេទប្រុស​ អាយុ១៧ឆ្នាំ​ ស្នាក់ផ្ទះជួល ក្រុម៣ ភូមិក្រោលគោ សង្កាត់ឡូម៉ែត្រ៦ ខណ្ឌឬស្សីកែវ រាជធានីភ្នំពេញ (ឃាត់ខ្លួនមានសារធាតុញៀន) ។

ក្នុងនោះ វត្ថុតាងដែលសមត្ថកិច្ចចាប់យកបាន រួមមាន ៖

- សោរខ្សៀលេខ៨ចំនួន​០១ ដែកសំប៉ែតចុងស្រួចចំនួន១ដើម

- ទូរស័ព្ទម៉ាក oppo A83 ចំនួន១ គ្រឿងគ្មានលេខស៊ីម

-ម៉ូតូ០១គ្រឿងម៉ាកឃ្លីក ពណ៌ស សេរី២០១៦ ពាក់ស្លាកលេខ បន្ទាយមានជ័យ 1M-8163 លេខតួ+ម៉ាស៊ីន0813469 (បានប្រគល់ទៅអោយជនរងគ្រោះវិញ) ។

បច្ចុប្បន្នជនសង្ស័យខាងលើ ត្រូវបានសមត្ថកិច្ចធ្វើការសាកសួរ និងកសាងសំណុំរឿងចាត់ការតាមច្បាប់បន្តទៀត ៕ អែល វិចិត្រ