រាជធានីភ្នំពេញ ៖ ករណីអគ្គិភ័យបានលេបត្របាក់អស់ក្លឹបកំសាន្ត​ Play 99 អស់ទាំងស្រុង បានបង្កការភ្ញាក់ផ្អើល នៅវេលាម៉ោង ៨និង១០នាទីយប់ ថ្ងៃទី១១​ ខែវិច្ឆិកា​ ឆ្នាំ២០២៣ ដែលស្ថិតនៅចំណុចក្លឹបកំសាន្ត​ Play 99 តាមផ្លូវចៃកា​ ភូមិ១៥​ ក្រុម៧៨​ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។ នេះបើយោងតាមផេក ការិយាល័យបង្ការពន្លត់អគ្គិភ័យ និងសង្គ្រោះ នៃស្នងការនគរបាលរាជធានីភ្នំពេញ។

ដោយមានការអនុវត្តតាមបទបញ្ជារបស់ ឯកឧត្តម ឧត្តមសេនីយ៍ទោ ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានណែនាំដល់កម្លាំងជំនាញការិយាល័យនគរបាលបង្ការពន្លត់អគ្គិភ័យ និងសង្គ្រោះ ត្រូវធ្វើការយកចិត្តទុកដាក់ខ្ពស់នៅក្នុងប្រតិបត្តិការជួយសង្គ្រោះប្រជាពលរដ្ឋឲ្យបានទាន់ពេលវេលា និងដោយទទួលបានបទបញ្ជារបស់ ឯកឧត្តម ឧត្តមសេនីយ៍ទោ ជួន ណារិន្ទ អគ្គស្នងការរងនគរបាល និងជាស្នងការនគរបាលរាជធានីភ្នំពេញ លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានដឹកនាំបញ្ជាផ្ទាល់ដល់កងម្លាំងពន្លត់អគ្គិភ័យដែលប្រចាំការនៅតាមបណ្តាលគោលដៅទាំងអស់ក្នុងរាជធានីភ្នំពេញ​ ដើម្បីចេញទៅជួយអន្តរាគមន៍បាញ់ទឹកពន្លត់ឲ្យទាន់ពេលវេលា កុំឲ្យមានការឆាបឆេះបន្តដល់ផ្ទះប្រជាពលរដ្ឋដែលនៅក្បែរនោះ។

ដោយនៅក្នុងប្រតិបត្តិការខាងលើនេះ កម្លាំងសមត្ថកិច្ចជំនាញ បានប្រើប្រាស់រថយន្តពន្លត់អគ្គិភ័យចំនួន២១៣គ្រឿង ក្នុងនោះរួមមាន រថយន្តពន្លត់អគ្គិភ័យរបស់ការិយាល័យរាជធានីភ្នំពេញ ចំនួន១៨គ្រឿង ប្រើប្រាស់ទឹកអស់១៨០ឡាន ស្មើរនឹង៧២០ម៉ែត្រគូប​,​ រថយន្តជំនួយមកពីក្រសួងមហាផ្ទៃ​ ចំនួន០២គ្រឿង​ ប្រើប្រាស់ទឹកអស់០៣ឡាន​ ,​ រថយន្តទីក្រុងកោះពេជ្រ​ ចំនួន០៣គ្រឿង​ ប្រើប្រាស់ទឹកអស់១៥ឡាន​ ,​ រថយន្តរបស់ក្រុមហ៊ុន​ ស្រាបៀរកម្ពុជា​ ចំនួន០១គ្រឿង​ ប្រើប្រាស់ទឹកអស់០១ឡាន​ ​,​ រថយន្តទីក្រុងជ្រោយចង្វារ ចំនួន០៥គ្រឿង​ ប្រើប្រាស់ទឹកអស់០៥ឡាន​ ​,​ រថយន្តផ្សារទំនើប​ អូឡាំព្យា​ ចំនួន០២គ្រឿង​ ប្រើប្រាស់ទឹកអស់០២ឡាន​ ,​ រថយន្តទីក្រុងនរា​ ចំនួន​០២គ្រឿង​ ប្រើប្រាស់ទឹកអស់០២ឡាន​ ,​ រថយន្តសួនឧស្សាហកម្មកាណាឌីយ៉ា​ ចំនួន០១គ្រឿង​ ប្រើប្រាស់ទឹកអស់០១ឡាន​ និងរថយន្តបុរីប៉េងហួត​ ចំនួន០២គ្រឿង​ ប្រើប្រាស់ទឹកអស់០៣ឡាន​។

លោកវរសេនីយ៍ឯក ព្រហ្ម យ៉ន បានបញ្ជាក់ថា ចំពោះករណីគ្រោះអគ្គិភ័យខាងលើនេះ ជាប្រភេទសំណង់ ថ្មបេតុង ទំហំ (១៥ម៉ែត្រ គុណ ២០ម៉ែត្រ) បានបណ្តាលឲ្យឆេះក្លឹបកំសាន្ត​ និងសម្ភារៈអស់ទាំងស្រុងដែលមានម្ចាស់ទីតាំងឈ្មោះ SUN JIAHU ភេទប្រុស អាយុ ៣២ឆ្នាំ ជនជាតិ ចិន មេការក្លឹប និងឆេះខូចខាតសម្ភារៈ ក្នុងក្លឹបអស់ទាំងស្រុង តែពុំបានបណ្តាលឲ្យឆេះរាលដាលដល់ផ្ទះអ្នកក្បែរខាងឡើយ។

លោកវរសេនីយ៍ឯក ព្រហ្ម យ៉ន បានបញ្ជាក់ជូនបន្ថែមទៀតថា ចំពោះករណីខាងលើនេះ កម្លាំងសមត្ថកិច្ចជំនាញរបស់យើងបានធ្វើការគ្រប់គ្រង់ទាំងស្រុងនៅវេលាម៉ោង ២និង៣០នាទីយប់ទាបភ្លឺថ្ងៃទី១២​ ខែឆ្នាំដដែរ។ ដោយក្នុងហេតុការណ៍នេះ គឺមិនបានបណ្តាលឲ្យអ្នកណាម្នាក់រងរបួសនោះឡើយ រីឯមូលហេតុ បណ្តាលមកពីការឆ្លងចរន្តអគ្គីសនី៕