ខេត្តតាកែវ ៖ ពិតជារន្ធត់ណាស់ សិស្សសាលាម្នាក់ កំពុងជិះម៉ូតូផ្លូវត្រង់ ស្រាប់តែមានរថយន្តហាយឡែនឌ័រ បត់ឆ្វេងមកចំណែកផ្លូវម្ខាងទៀត គេចមិនផុត ក៏ប៉ះដួលទៅលើផ្លូវ រួចត្រូវរថយន្តមិនចាំម៉ាកមួយគ្រឿងទៀត កិនស្លាប់យ៉ាងរន្ធត់ ហើយបន្តល្បឿនគេចខ្លួនបាត់ស្រមោល ។

ហេតុការណ៍នេះបានកើតឡើងកាលពីវេលាម៉ោង ៤និង ១០នាទី ល្ងាចថ្ងៃទី១១ ខែ វិច្ឆិកា ឆ្នាំ២០២៣ នៅលើផ្លូវជាតិលេខ៣ ចន្លោះគីឡូម៉ែត្រលេខ ៤៥-៤៦ ស្ថិតនៅក្នុងភូមិត្រពាំងឈូក ឃុំសូភី ស្រុកបាទី ខេត្តតាកែវ ។

សមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍នេះ កើតឡើងរវាង រថយន្ត ម៉ាកហាយឡែនឌ័រ ពណ៌សំបកឪឡឹក ពាក់ផ្លាកលេខ ភ្នំពេញ 2AA-4553 បើកមកពីជើងបត់ទៅទិសខាងកើត ពេលនោះក៏មានម៉ូតូម៉ាកហុងដាសេ១២៥ ពណ៌ខ្មៅ ពាក់ផ្លាកលេខ កំពត 1K-3645 បើកមកពីទិសខាង ត្បូងដោយ ឈ្មោះ គុណ សុភ័ក្រត្រា ភេទប្រុស អាយុ ២០ឆ្នាំ មានទីលំនៅភូមិអូរពពូល ឃុំដំណាក់កន្ទួតខាងជើង ស្រុកកំពង់ត្រាច ខេត្តកំពត មុខរបរ សិស្ស (ពាក់មួកសុវត្ថិភាព) ក្នុងល្បឿនលឿន​ គេចមិនផុត ក៏បានប៉ះជាមួយរថយន្តនេះ រួចខ្ទាតដួលទៅលើផ្លូវ ត្រូវបានរថយន្តមិនចាំម៉ាកមួយគ្រឿងទៀត បើកស្របទិសគ្នា បានកិនយុវជនជាអ្នកបើកបរម៉ូតូ ស្លាប់យ៉ាងរន្ធត់តែម្តង រួចបន្តល្បឿនគេចខ្លួនបាត់ ។ ដោយឡែកអ្នកបើកបររថយន្តហាយឡែនឌ័រ ក៏មិនបាននៅទីតាំងកើតហេតុដែរ បានគេចខ្លួនទៅបាត់ សល់តែរថយន្តប៉ុណ្ណោះ ។

ក្រោយកើតហេតុ សមត្ថកិច្ចជំនាញចរាចរណ៍ផ្លូវគោក នៃអធិការដ្ឋាននគរបាលស្រុកបាទី បានចុះមកធ្វើការវាស់វែង យករថយន្តនិងម៉ូតូ ទៅរក្សាទុកនៅអធិការដ្ឋាននគរបាលស្រុកបាទី ដើម្បីស្រាវជ្រាវនិងបំពេញបែបបទបន្តតាមនីតិវិធី។ ចំណែកសពបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ៕ អែល វិចិត្រ