រាជធានីភ្នំពេញ ៖ ជនសង្ស័យវ័យចំណាស់ម្នាក់ ធ្វើសកម្មភាពកាច់សោកលួចម៉ូតូរបស់ជនជាតិចិន ត្រូវបានបងប្អូនប្រជាពលរដ្ឋ និងសមត្ថកិច្ចនៃអធិការដ្ឋាននគរបាលខណ្ឌកំបូល ធ្វើការឃាត់ខ្លួនបាន បង្កការភ្ញាក់ផ្អើលកាលពីថ្ងៃទី១១ ខែវិច្ឆិកា ឆ្នាំ២០២៣ នៅចំណុចផ្លូវលេខ 11KB ផ្ទះលេខ៦៩ ក្នុងបុរីពិភពថ្មីកំបូលពីរ ខណ្ឌកំបូល រាជធានីភ្នំពេញ។

សមត្ថកិច្ចបានឲ្យដឹងថា ដោយមានបទបញ្ជាពី​ ឯកឧត្តម​ ឧត្តមសេនីយ៍​ឯក​ ជួន​ ណារិន្ទ​ អគ្គស្នងការរង​ និងជាស្នងការនគរបាលរាជធានីភ្នំពេញ

នៅថ្ងៃទី ១១ ខែវិច្ឆិកា​ ឆ្នាំ២០២៣ អធិការដ្ឋាននគរបាលខណ្ឌកំបូល​ ដឹកនាំដោយលោកវរសេនីយ៍ឯក​ ហុង​ ពិសិដ្ឋ​ អធិការនគរបាលខណ្ឌកំបូល

បានធ្វើការឃាត់ខ្លួនជនសង្ស័យម្នាក់ ក្នុងចំណោមបក្ខពួក២នាក់ ក្នុងករណីលួចម៉ូតូ​ម៉ាកហុងដាឌ្រីមពណ៌ខ្មៅ ស៊េរីឆ្នាំ២០១៩ ពាក់ផ្លាកលេខភ្នំពេញ 1HS-6126 លេខតួនិងលេខម៉ាស៊ីន 5559892 ចេញពីផ្ទះ​ នៅផ្លូវលេខ 11KB ផ្ទះលេខ៦៩ ក្នុងបុរីពិភពថ្មីកំបូលពីរ ។

ជនសង្ស័យចំនួន ០២នាក់នេះរួមមាន ៖

១.ឈ្មោះ តាំង សុខខៃ ភេទ ប្រុស អាយុ ៦៥ឆ្នាំ ទីលំនៅបច្ចុប្បន្នភូមិទូមាស ឃុំតាអុង ស្រុកចំការលើ ខេត្ត កំពង់ចាម (ឃាត់ខ្លួន)

២.ឈ្មោះ អាលី ភេទ ប្រុស អាយុ ២៨ឆ្នាំ (គេចខ្លួន)

​

ចំណែកជនរងគ្រោះឈ្មោះ LIU JIAN MING ភេទ ប្រុស អាយុ ៤៦ឆ្នាំ ជនជាតិចិន ស្នាក់នៅភូមិស្ងួនពេជ្រ សង្កាត់កន្ទោក ខណ្ឌកំបូល រាជធានីភ្នំពេញ។

បច្ចុប្បន្នកម្លាំងជំនាញនៃអធិការដ្ឋាននគរបាលខណ្ឌកំបូល​ កំពុងកសាងសំណុំរឿងដើម្បីបញ្ជូនទៅសាលាដំបូងរាជធានីភ្នំពេញ​ ចាត់ការតាមនីតិវិធីច្បាប់៕ មេសា