ខេត្តតាកែវ ៖ យុវជនម្នាក់ បានស្លាប់យ៉ាងរន្ធត់ នៅលើដងផ្លូវ ខណៈជិះម៉ូតូMSX ក្នុងល្បឿនលឿន រេចង្កូតមកបុកជាមួយរថយន្តមួយគ្រឿងទៀតពេញទំហឹង ពេលនេះមិនទាន់រកសាច់ញាតិឃើញនៅឡើយ ។

ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង១០ និង២៥នាទី យប់ថ្ងៃទី ១៥ ខែ វិច្ឆិកា ឆ្នាំ២០២៣ នៅលើផ្លូវជាតិលេខ២ ចន្លោះគីឡូម៉ែត្រលេខ ៤៦-៤៧ ស្ថិតនៅក្នុងភូមិរុន ឃុំចំបក់ ស្រុកបាទី ខេត្តតាកែវ ។

សមត្ថកិច្ចជំនាញ បានបញ្ជាក់ប្រាប់ TVFB ឲ្យដឹងថា ករណីគ្រោះថ្នាក់ចរាចរណ៍នេះ កើតឡើងរវាង ម៉ូតូម៉ាក MSX ពណ៌ខ្មៅ ពាក់ផ្លាក ភ្នំពេញ 1IC-4234 បើកបរពីជើងទៅត្បូងដោយឈ្មោះ មិនស្គាល់អត្តសញ្ញាណ (ព្រោះរកសាច់ញាតិមិនឃើញ) ក្នុងល្បឿនលឿន លុះដល់ចំណុចកើតហេតុ រ៉េចង្កូតមកចំណែកផ្លូវខាងកើត ក៏បានបុកជាមួយរថយន្តម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 3E-3561 បើកមកពីទិសខាងត្បូងទៅជើង បញ្ច្រាសទិសគ្នា ចំពីមុខផ្នែកខាងស្តាំ បណ្ដាលឲ្យស្លាប់តែម្ដង ។ ចំណែកអ្នកបើកបររថយន្ត បានបើកទ្វាររថយន្តគេចបាត់ពីកន្លែងកើតហេតុ ។

ពេលនេះ សពត្រូវបានកម្លាំងជំនាញកំពុងស្វែងរកសាច់ញាតិ ។ រីឯវត្ថុតាង ម៉ូតូនិងរថយន្ត ត្រូវបានដកហូតយកមករក្សាទុកនៅអធិការដ្ឋាននគរបាលស្រុកបាទី ដើម្បីស្រាវជ្រាវនិងបំពេញបែបបទបន្តតាមនីតិវិធី ៕ អែល វិចិត្រ