រាជធានីភ្នំពេញ ៖ កម្លាំងនៃអធិការដ្ឋាននគរបាលខណ្ឌឬស្សីកែវ បានធ្វើការឃាត់ខ្លួនជនសង្ស័យចំនួន ២នាក់ ពាក់ព័ន្ធករណីលួចម៉ូតូ កាលពីវេលាម៉ោង ១០ និង៣០នាទីយប់ ថ្ងៃទី១៥ ខែវិច្ឆិកា ឆ្នាំ២០២៣ នៅចំណុចភូមិផ្សារតូច សង្កាត់ទួលសង្កែទី១ ខណ្ឌប្ញស្សីកែវ រាជធានីភ្នំពេញ ដែលប្រព្រឹត្តល្មើសនៅចំណុចផ្ទះគ្មានលេខ ផ្លូវលំ ភូមិព្រែកតាទេព ឃុំព្រែកលឿង ស្រុកពញាឮ ខេត្តកណ្ដាល ខណៈកម្លាំងកំពុងល្បាតក្នុងមូលដ្ឋាន។
សមត្ថកិច្ចបានឲ្យដឹងថា បានឃាត់ខ្លួនជនសង្ស័យចំនួន០២នាក់ ខាងលើរួមមាន ៖
១. ឈ្មោះ យុន ចាន់ថុល ភេទប្រុស មុខរបរកម្មករសំណង់ មានទីលំនៅផ្ទះគ្មានលេខ ភូមិព្រែកក្របៅ ឃុំព្រែកក្របៅ ស្រុកខ្សាច់កណ្ដាល ខេត្តកណ្ដាល (មានសារធាតុញៀន)។
២. ឈ្មោះ សា វត្តី ភេទប្រុស មុខរបរកម្មករសំណង់ មានទីលំនៅផ្ទះគ្មានលេខ ភូមិព្រែកលួង ឃុំព្រែកលួង ស្រុកខ្សាច់កណ្ដាល ខេត្តកណ្ដាល (មានសារធាតុញៀន)។
ក្នុងនោះ សម្ភារៈដកហូត៖ ទូរស័ព្ទម៉ាកអិនចុចពិល ពណ៌ខ្មៅ, ម៉ូតូម៉ាកហុងដាសេ១២៥ ពណ៌ក្រហម គ្មានផ្លាកលេខ។
បច្ចុប្បន្ន ជនសង្ស័យ រួមទាំងវត្ថុតាងខាងលើ កម្លាំងនៃអធិការដ្ឋាននគរបាលខណ្ឌប្ញស្សីកែវ បានធ្វើការប្រគល់ជូនកម្លាំងនៃអធិការដ្ឋាននគរបាលស្រុកពញាឮ ខេត្តកណ្តាល ដើម្បីចាត់ការតាមនីតិវិធី៕
