ខេត្តបាត់ដំបង ៖ យោងតាមផេកផ្លូវការរបស់ ស្នងការដ្ឋាននគរបាលខេត្តបាត់ដំបង បានឲ្យដឹងថា នៅថ្ងៃទី១២ខែមីនា ឆ្នាំ២០២៤វេលាម៉ោង ៣រសៀល នៅចំណុចក្រុមទី០១ ភូមិអូរម៉ាល់សង្កាត់ អូរម៉ាល់ ក្រុងបាត់ដំបង ខេត្តបាត់ដំបង អនុវត្តតាមយោបល់ដឹកនាំរបស់លោកឧត្តមសេនីយ៍ ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបងនិងលោកវរសេនីយ៍ឯក សុខ និមល ស្នងការរងផែនការងារប្រឆាំងគ្រឿងញៀនលោកវរសេនីយ៍ឯក ពេជ្រ សារ៉ែន អធិការនគរបាលក្រុងបាត់ដំបង ដឹកនាំកម្លាំងជំនាញផ្នែកប្រឆាំងគ្រឿងញៀន នៃអធិការដ្ឋាននគរបាលក្រុង បង្ក្រាបករណី រក្សាទុក ជួញដូរឬដឹកជញ្ជូនដោយខុសច្បាប់នៅសារធាតុញៀន០១ ករណីក្នុងបទល្មើសជាក់ស្ដែង ឃាត់ខ្លួនជនសង្ស័យម្នាក់ ឈ្មោះ ឡាយ សុផល ភេទប្រុសអាយុ ៤៦ ឆ្នាំមានទីលំនៅបច្ចុប្បន្នក្រុម ២៤ ភូមិ អូរតាគាំ២ សង្កាត់ទួលតាឯក ក្រុងបាត់ដំបងខេត្តបាត់ដំបង។
ក្នុងនោះសមត្ថកិច្ច ចាប់យកសម្ភារៈវត្ថុតាងរួមមាន៖
-ម្សៅក្រាមពណ៌សថ្លាច្រកក្នុងថង់ផ្លាស្ទិកចំនួន ០៣ ថង់សង្ស័យមានសារធាតុញៀន
-ទូរសព្ទដៃចំនួន ០១ គ្រឿង(ចាស់)
-កាបូបដាក់ប្រាក់ចំនួន ១
-ម៉ូតូចំនួន០១គ្រឿងម៉ាកស៊ុយសូគីស្មាស់ពណ៌ក្រហមពាក់ស្លាកលេខភ្នំពេញ1A-6957។
ឆ្លងតាមចម្លើយសារភាពរបស់ជនសង្ស័យខាងលើនៅវេលាម៉ោង៣និង៣០ រសៀលថ្ងៃដដែល សមត្ថកិច្ចបន្តឃាត់ខ្លួនមេខ្លោងម្នាក់ ទៀតឈ្មោះគិន សារិ ភេទប្រុសអាយុ ៨៦ឆ្នាំ ជនជាតិខ្មែរ សញ្ជាតិខ្មែរ មានទីលំនៅបច្ចុប្បន្នរស់នៅក្រុម ២២ ភូមិទួលតាឯក សង្កាត់ទួលតាឯក ក្រុងបាត់ដំបងខេត្តបាត់ដំបង។
ក្នុងនោះ វត្ថុតាងចាប់បានរួមមាន៖
-ម្សៅក្រាមពណ៌សថ្លាច្រកក្នុងថង់ផ្លាស្ទិកចំនួន ៣៨ ថង់សង្ស័យមានសារធាតុញៀន
-ថ្នាំគ្រាប់ពណ៌ក្រហមរាងមូលសំប៉ែតមានអក្សរបរទេស(WY)ចំនួន ១១គ្រាប់
-ទូរសព្ទដៃចំនួន០១គ្រឿង(ចាស់)
-ថង់ផ្លាស្ទិកសម្រាប់ច្រករំលែកថ្នាំញៀនលក់មួយចំនួន ។
ពេលនេះសមត្ថកិច្ចនគរបាលបានកសាងសំណុំរឿងបញ្ជូនមកករិយាល័យជំនាញដើម្បីអនុវត្តទៅតាមផ្លូវ ច្បាប់៕
